Diaranson mainta cerca di 31 mucha muhe a muri den un incendio cu a tuma lugar den un centro di menor situa na sureste di capital di Guatemala. Cuerpo di bombero a bisa cu e incidente a sucede entre diamars anochi y diaranson marduga na Hogar Seguro Virgen de Asunción, situa na municipio José Pinula, despues cu e dia prome a huy 60 mucha cu tabata interna den e centro aki. Cuerpo di emergencia a traslada mas di 30 persona cu a resulta herida pa diferente hospital.
Hogar Seguro Virgen de Asunción, ta depende di secretaria di bienestar social di presidencia y tin adopta mas di 600 mucha muhe y adolescente cu ta consisti di victima di violencia di famia, mucha chikito riba caya, hoben cu problema di droga of abuso sexual.
E tragedia a pasa cu total conocemento di e muchanan cu tabata deteni eyden, pasobra prisoneronan a bisa nan famia cu nan tabatin planea un protesta riba diamars atardi, momento cu algun di nan a logra huy, despues di laga hopi desastre atras den e centro.
Na momento cu tabata parce cu tur paz a bolbe, anto diaranson mainta un grupo di prisonero a cende corchonnan den nan cel. E candela a move bay den tur parti di e centro y a bay for di control. Famia di hoben cu ta interna den centro a bisa cu e abuso di autoridadnan ta desde maltrato verbal, fisico y psicologico te violacion sexual via monitor. Prohibicion pa tene bishita di famia y calidad abao di cuminda ta otro causa di malestar tambe.
Ayera merdia na alrededor di e centro di menor tabata hopi visibel e presencia di polis, pa motibo di temor cu grupo di famia lo a purba drenta cu forsa y asina haya sa kico a pasa cu nan familiar cu tabata interna eyden. Un di e mamanan di prisonero a mustra hopi desesperacion, y a bisa cu nan no tin ningun informacion. “ Nos tin derecho pa haya sa kico a pasa cu nos yiunan”.
Dilanti di un presencia di polis basta grandi, medionan di prensa a mira algun mucha muhe cu a sali cu nan cara tapa cu serbete, y a ser traslada pa vehiculo di e sistema penitenciario pa otro centro di detencion. Te na e momento aki nan no sa unda e resto di e prizoneronan cu a salba su mes di incendio aki ta.
