31 % di number auto no ta paga pa 2015

ORANJESTAD – Aña 2015 ta bira record pa hendenan cu no a paga number di auto pa aña 2015 pa cual esaki a yega un total di 31 % cu no a paga cu ta representa 20 mil number di auto. Meverly Romano ta splica di e situacion mirando cu 30 di september tabata e ultimo fecha pa paga.

“30 di september tabata e ultimo di pa paga e ultimo kwartaal di aña 2015, esey ta nifica cu pa prome di october tur vehiculo di motor riba camindanan publico lo mester tin e plachi di number grandi y chikito. Na e momentonan aki e cifranan te cu 29 di september ta indica cu 69% ta paga debidamente sinembargo 31% falta pa haci pago. Esaki ta representa 20923 plachi cu no tin pago haci manera cu mester ta. Sea cu tin clientenan cu a paga un of dos kwartaal pero no a paga e pago completo di 2015. E in cumplimento aki manera ya nos a mira caba den pasado ta mas grandi den e categoria di plachi A caminda cu tin un total di 17048 number cu no ta paga manera cu mester ta.”

El a sigui splica cu e 17048 ta representa 25% di e total di number cu tin registra. 1 cuart di autonan cu tin riba careteranan publico no tin e impuesto paga manera mester ta den categoria di plachi A. E otro categoria cu tin cantidad halto cu no ta paga manera cu mester ta cual ta V-car cual cu ta 59% di e cantidad di V-car cu in registra. E otro categorianan cu ta registra ta e trucknan di diesel caminda cu tin 1034 truck registra, y di e cantidad aki 645 truck cu no tin e pago haci manera mester ta. Pa loke ta brommernan, ta mira cu di 1948 brommer registra, brommernan particular 267 no tin e number paga. “Mi mester bisa cu e brommernan no ta haya e facilidad pa paga e impuesto den kwartaal. Ora cu ta trata di un brommer e belasting mester wordo paga den un biaha pa full e aña. Esey ta nifica cu di e cantidad registra 267 no por ta riba caminda. E otro categorianan mas chikito ta esunnan di autobus pues plachi B cu tin 64 di nan cu no a cumpli manera mester ta y 83 taxi cu no a cumpli manera mester ta. El a termina cu asina ta yega e cantidad cu ta representa 31% di in cumplimento ariba menciona.