Tur 31 di mei ta celebra Dia Internacional Sin Tabaco, un dia cu Organisacion Mundial di Salud (OMS)a duna impulso na 1987 cu e obhetivo di informa y conscientisa hende tocante e efectonan dañino y mortal di consumo di tabaco y di exposicion pasivo na e huma di e substancia aki.

Pa aña 2023 e lema di Organisacion Panamericano di Salud (PAHO) conhuntamente cu OMS ta: “Cultiva alimento, no tabaco.” Den esaki nan ta enfoca riba e daño pa salud di tur hende, tanto pa agricultornan como pa henter e planeta na momento cu ta cultiva tabaco.

Industria tabacalero ta interferi den intento pa substitui e cultivo di tabaco, contribuyendo na e crisis alimentario mundial manera nan website ta indica.

Na mundo, tin mas di 124 pais cu ta produci tabaco como cultivo comercial y nan ta destina e actividad ey na un superficie calcula na 3.2 miyon hectar di tera fertil.

E tres pais principal productor di blachi di tabaco ta China, Brazil y India. Nan ta concentra mas di 60% di e produccion mundial. Na medida cu e normativanan di e paisnan di ingreso mediano y halto ta bira mas dificil, e companianan tabacalero ta dirigi cada biaha mas na paisnan Africano pa aumenta nan produccion di blachi di tabaco.

Ta p’esey cu ta purba di desconseha hende pa consumi tabaco di tur forma, y di igual manera evidencia e practicanan comercial di companianan tabacalero pa stimula e consumo di tabaco y publica e actividadnan di OMS den e lucha contra consumo di tabaco.

Cada dia consumo di tabaco ta mata aproximadamente 6 miyon persona, un cifra cu ta premira por aumenta hasta mas di 8 miyon pa aña 2030 si e medidanan pa evita esaki no ta implementa.

Manera ta conoci, su uso ta perhudicial pa tur hende causando malesa, morto y ta pone e famianan mas pober igualmente cu nan economia nacional debi na gastonan di salud publico.

Ademas, e cultivo di tabaco ta usa cantidadnan grandi di plaguicida y fertilisante toxico cu ta contamina awa y ta causa deforestacion y secura.

Ta hopi motibo pa cual hende mester stop di huma, pero sin duda esun di mas poderoso ta e salud di e mesun hendenan. Den esaki, ta causa malesa di cancer, causando dañonan grandi na pulmonnan y tambe ta influi den aparicion di tumornan na boca, riñon, pancreas, entre otro organo.

Tin estudionan cu ta demostra cu humamento ta un factor cu ta provoca e riesgo mayor di sufrimento di leukemia y cancer di stoma, di mama, di higra y utero.

Humamento ta aumenta e ritmo di curason y presion arterial, loke tambe ta aumento e riesgo di haya un malesa coronario. Tambe ta causa bronkitis cronico y e sintomanan den sistema respiratorio, loke ta nifica e malesa pulmonar mas destructivo.

Tanto pa hende muhe como pa hende homber humamento por disminui nan capacidad fertil y den hende homber por causa erectile dysfunction.

E djentenan ta bira geel y por provoca malesanan di djente, tambe ta acelera envehecemento di cuero y lashinan ta cuminsa aparece den e cara.

 

Pa hende muhe cu ta gusta huma, nan tin e riesgo mayor di presenta aborto y complicacion den embaraso y parto. E yiunan di mama humado ta nace cu menos peso, loke ta asocia na un riesgo mayor di fayecimento y malesanan di e baby durante periodo di bebe lechi di pecho y su prome infancia.

Tambe ta importante pa destaca cu productonan nobo y informacion falso ta menasa di tira afo decadanan di lucha contra tabaco. Mediante un publicacion riba su website, Organisacion Panamericano di Salud (PAHO) ta informa cu e porcentahe di poblacion cu ta consumi tabaco na America a reduci di 28% pa 16,3% entre 2000 y 2020; productornan novedoso y informacion falso di industria tabacalero dirigi specialmente riba e hobennan ta reduci e logronan cu e promocion di “VAPER” na unda a sigura cu ocho pais den region a prohibi su uso y comercialisacion. Nan ta preocupa cu den 14 pais te ainda no a tuma ni un tipo di accion tocante esaki.

Pa enfrenta e menasa aki, director di PAHO doctor Jarbas Barbosa ta considera fundamental pa paisnan pone den marcha politicanan pa evita su consumo, principalmente entre hobennan, ya cu esey por nifica e porta pa consumo di tabaco.

Na aña 202 sur America a bira e prome sub-region 100 liber di huma di tabaco, kiermen na unda ta existi un prohibicion total di huma na luganan publico y luganan di trabao cera, ademas di transporte publico. Como resultado, 63% di e poblacion di America, loke ta nifica mas di 600 miyon persona, awor ta protegi di exposicion na huma di tabaco.