Na Aruba tambe e Colombianonan lo haya chens pa participa den asina yama Referendum di Paz.
Gobierno di Colombia di presidente Juan Manuel Santo a haci uzo di e instrumento aki pa puntra pueblo si nan ta aproba Si of No, e acuerdo cu nan a negosha cu guerrilla di Farc. E referendum lo tuma luga riba dia 2 di october awor.
Consulado di Colombia na Aruba a manda un comunicado di Ministerio di Relacion Exterior di Colombia riba e referendum cu no solamente lo tuma luga den nan teritorio nacional, sino den nan mision diplomatico den exterior, entre nan Aruba.
Segun Registraduria Nacional di Estado Civil di Colombia, e censo electoral di Colombianonan den exterior ta 599.026 persona. Y segun censo electoral cu Consulado di Colombia na Aruba ta maneha, un total di 3024 Colombiano residencia riba nos isla ta debidamente registra pa haci uzo di nan derecho di participacion den e referendum aki. Kiermen cu esun cu lo por vota den e consulado ta esunnan cu a participa den e censo electoral di 2014. Igualmente e Colombianonan cu a solicita nan cedula di Colombia pa prome biaha prome cu dia 2 di juni 2016, lo por vota tambe. Sigur e cantidad di Colombiano na Aruba ta mucho mas grandi cu e cantidad di esunnan cu ta aparece registra debidamente den e censo electoral cu Consulado di Colombia ta maneha.
Pero ta bon pa nan tene cuenta cu no lo tin inscripcion di cedula pa participa den e referendum aki. E decision aki a keda estableci den e Ley 1806 di 24 di augustus 2016 di Congreso di Colombia.
Pa nan por vota den e referendum aki, e ciudadano Colombiano mester identifica su mes cu su cedula Colombiano original den e Consulado di Colombia, unda e cedula a wordo solicita. Ni un copia di e cedula, tampoco e comprobante di e solicitud di e cedula y tampoco e paspoort no lo ta valido pa eherce e derecho di voto den e referendum di dia 2 di october awor.
E referendum aki lo tuma luga den e instalacion di e sede diplomatico aki; y e dia ey (2 di october) lo wordo instala 7 mesa di votacion. Nan lo por vota entre 8’or mainta te cu 4’or atardi na Julianastraat 4 local 2.
Logistica
Registraduria Nacional di Estado Civil di Colombia a informa cu e Colombianonan inscribi den exterior lo por vota den e “referendum pa aproba e acuerdo final pa termina e conflicto y pa construi un paz stabiel y duradero. E instancia aki hunto cu Canciyeria di Colombia ta trahando riba e logistica cu lo tuma luga den cada embahada y consulado di Colombia den exterior, pa asina nan conciudadano den exterior lo por participa den e referendum historico aki.
Na diferencia di otro actividad electoral cu gobierno di Colombia a realisa den nan sede diplomatico den exterior, e referendum aki lo tuma luga riba un dia so. E dia cu a wordo convoca pa e Colombianonan participa den e referendum aki ta diadomingo 2 di october proximo.
Pa e votacion den e referendum aki, cada mesa di votacion lo conta cu cuater hurado pa cada mesa, dos principal y dos suplente. E hurado di mesa di votacion lo duna un certificado na fabor di e votando pa nan por gosa di e beneficionan cu ta consagra den e Leynan 403 di 1997 y 815 di 2003. Den e caso specifico di e Colombianonan den exterior nan lo por haya un descuento di un 10% riba nan paspoort nobo.
Campaña
Conseho Nacional Electoral di Colombia a establece cu e Colombianonan bibando den exterior lo por organisa nan mes den comite di campaña pa apoya ya sea e opcionnan Si of No. E comite di campaña den e referendum aki mester ta integra pa minimo 3 miembro y no maximo di 9 miembro. E comitenan aki lo mester ta inscribi den e consulado di Colombia na Aruba, pero nan mester entrega un formulario disponibel via e link aki: http://www.cne.gov.co/cne/media/file/FORMULARIO.pdf
Ademas e comite di campaña debidamente inscribi lo por postula nan huradonan di votacion te mañan dia 7 di september. E hurado mester ta ciudadano menor cu 60 aña y mayor cu 18 aña di edad, y nan lo wordo selecta pa medio di un sorteo. Ministerio di Relacion Exterior di Colombia ta wardando instruccion di Registraduria Nacional (Censo di Colombia) riba con otro Colombianonan interesa pa bira hurado lo por inscribi nan nomber, ya cu nan no a wordo postula dor di e comite di apoyo of campaña.
