E ultimo 9 simannan Corsou su banco di cuminda (voedselbank) a parti en total 30 mil pakete di cuminda na un promedio di entre 11 mil pa 12 mil hogar.
Ta trata aki di un total di mas o menos 48 mil persona cu mensualmente ta bati porta cerca e banco di cuminda riba e isla. Asina Sheryl Losiabaar, presidente di Voedselbank Curacao a indica riba preguntanan di Antilliaans Dagblad.
Pa cada adres cu ta registra na e voedselbank ta suministra un biaha pa luna un pakete di productonan. Un parti di e 12 mil hogar, cu ta den necesidad alarmante, ta ricibi 3 pakete di cuminda pa luna. Pa otro adresnan cu a registra mas despues, a suministra 1 of 2 pakete pa luna.
Corsou tin mas o menos 160 mil habitante. Si asumi cu cada hogar tin 4 persona, e ora ey 48 mil persona na Corsou ta den necesidad ora ta trata di cuminda. E cantidad ta gigantico y demasiado grandi, Losiabaar ta expresa. Su fundacion, prome cu e pandemia mundial causa pa coronavirus, tabata parti mas o menos 350 pakete di cuminda mensualmente.
E cantidad aki den temponan di covid a multiplica 14 biaha di loke e tabata. E echo cu e fundacion por parti asina hopi pakete di cuminda ta bin pa via di e donacion di 14 miyon florin cu ministerio di asuntonan interno y di relacionnan di Reino a haci disponibel pa Cruz Cora di Corsou.
Actualmente e fundacion ta cumpra e productonan, mientras Cruz Cora ta paga e facturanan. Un pakete ta costa 78 florin. Losiabaar ta bisa cu “nos ta purba spaar cen ora di cumpra pa asina nos por yuda mas hende cu ta posibel.”
Actualmente tambe ta e caso cu ta preparando pa mas y mas di e hogarnan bay cumpra cuminda na supermercado nan mes, cual nan por haci por medio di un voucher. E piloto di e proyecto ey lo cuminsa proximo siman. “A base di criteria lo dicidi ki hogarnan ta bin na remarke pa esaki”, Losiabaar a bisa.
