Despues di desaroyo di crecemento negativo, juli ta mustra un miho resultado cu 2,9% mas turista compara cu e mesun luna aña pasa. E cifranan aki ta di Aruba Tourism Authority (ATA).
Sinembargo durante e prome 7 luna di 2017 629,015 turista a bishita nos isla, cual ta 7% menos cu e mesun temporada aña pasa.
102,272 bishitante a bin pasa nan vakantie na Aruba luna pasa. Si compara juli 2016 cu juli 2017, no obstante e caida di mercado Venezolano, e aumento aki ta un indicacion di stabilidad y crecemento continuo di Aruba su turismo. Alabes, e cifranan ta indica crecemento den mercadonan clave pa Aruba, manera Merca, Canada y Europa, segun ATA.
Compara cu juli aña pasa, pa 2017 e turismo procedente for di e continente Norte Americano a aumenta cu 9,2% y ta trece 68.0% di total di turismo pa nos destinacion. Na juli, Merca a aumenta cu 8,9% y Canada cu 18,1%. Pa e prome 7 lunanan di 2017, e continente aki a subi cu 8,9% pa turismo pa Aruba.
Continente Latino Americano a baha cu 8% di cual Venezuela a baha cu 29,1% compara cu julia ña pasa. Colombia a subi cu 22,7%. E continente di Latino America ta trece 20,6% di e total di turismo pa luna di juli na nos isla. Pa e prome 7 lunanan, turismo procedente di Latino America a baha cu 42,3% primordialmente mara na caida for di Venezuela.
Pa loke ta Europa por nota un aumento di 2,6% compara cu e mesun luna aña pasa. Hulanda a baha cu 3.0% y Reinonan Uni a aumenta cu 12,5%. E continente Europeo ta representa 8,5% di turismo pa Aruba pa luna di juli.
Pa e prome 7 luna, Europa a trece 6,3% turista mas pa Aruba compara cu e mesun temporada na 2016.
Aumento turismo di crucero
31,888 pasahero crucero a bishita nos destinacion riba un total di 14 diferente barconan crucero. Compara cu luna di juli aña pasa, turismo crucero a crece cu 68,5% (juli 2016 Aruba a haya 18,921bishitante for di 8 crucero). En total pa e prome 7 luna di 2017, Aruba a ricibi 467,025 pasahero crucero for 197 diferente barco. Esaki ta ekivalente na un aumento di 18,2% pasahero adicional pa nos isla (10 barco crucero mas) compara cu e mesun temporada aña pasa .
Hotelnan
Segun Aruba Hotel and Tourism Association (Ahata) pa e luna di juli, e Average Daily Rate (ADR) a aumenta cu 3% compara cu 2016. Esaki den cifra ta US$ 203,67 na 2016 compara cu US$ 209,72pa 2017. E rendimento pa camber disponibel, e asina yama RevPAR a aumenta cu 6,4% di US$ 170,99na 2016 pa US$ 182 na 2017. E anochinan ocupa (ORN) pa camber a aumenta cu 4,5%.
