Minister di Husticia Andin Bikker a cuestiona cu durante e ultimo gobernacion aspecto social cu tin di haber cu proteccion di nos muchanan no a haya e debido atencion.
Ayera tardi minister Bikker tabatin programa un reunion urgente cu Procurador General (hefe di Ministerio Publico), ya cu nan kier bin cu un proceso di analisis pa identifica tur e casonan di famia cu ta core risico, manera e caso lamentabel di e dos menor morto. E ta bisa cu e casonan aki ta un señal cu ta exigi pa bin cu cambio ya cu e ta compronde cu tin mas casonan di riesgo. Hopi biaha e leynan no ta permiti pa entremete den e forma con un persona ta cria un criatura. Pero den todo caso nan ta bay traha un registro of up date e registro cu por tin pa duna mas atencion pa preveni cu un caso similar na Aruba atrobe.
E ta kere cu despues di e caso lamentabel aki siguramente ta bay start un discusion nacional den nos comunidad. Un discusion cu tin di haber te unda un castigo ta wordo considera como maltrato si of no. Internacionalmente e concepto cu ora bo ta cria un mucha bo por dal un klap di bes en cuando pa coregi e mucha ta wordo evalua. Pues mester determina te hasta unda esaki ta wordo considera di coreccion y educativo. Of ki ora ta trata di un acto di maltrato. El a bisa cu e tratado aki cu ta data di 2009, gobierno anterior tabatin conocemento di dje pero cu no a haci nada. Mientras cu Hulanda si a bin cu un cantidad di pasonan.
Minister Bikker a bisa cu su gobierno si ta bay atende cu e tratado aki urgentemente. Ya caba dialuna e tabatin un encuentro cu DirectieVoogdijraad y tambe el a reuni cu otro instancia caba, unda e por ripara cu tabatin un abandono di parti di e ministernan saliente pa atende cu tipo di asuntonan social asina.
