Aunke gerencia di TeleAruba no a reconoce di biaha FTA como e sindicato di nan trahadonan, finalmente y despues di varios reunion a keda acorda cu lo tin un referendum den un tempo mas cortico. Esaki sin mester di bay den full un proceso di casi dos luna cu e celebracion di un referendum ta demanda.

Den e caso aki a keda palabra cu e referendum ta tuma luga diabierna 25 di augustus parti mainta. Ainda nan mester determina e sitio unda e lo wordo haci.

Plaso di 14 dia y aviso
Aunke nada ta preto ariba blanco ainda, tin palabracion y pronto lo firma un acuerdo. Sinembargo si e acuerdo aki ta wordo firma ta puro formalidad, ya cu nediador di gobierno, Anselmo Pontilius a señala cu e ta mira cu esaki no ta necesario; ya cu den su presencia a keda palabra cu despues di cumpli cu e plaso di 14 dia inicial lo bin cu e referendum dia 25 di augustus. 

El a declara cu e proceso aki ta canando caba. Ya caba e anuncio cu e ley di referendum ta exigi pa convoca e referendum a keda publica den medionan di comunicacion. E prome 14 dia ta den su proceso den cual cualkier otro sindicato por informa Mediador di Gobierno su intencion di participa den e referendum. Si esaki ta e caso nan mester prueba mescos cu FTA cu nan tin e miembronan.Den nan reunion di ayera a keda palabra cu den todo caso ambos partido mester warda cu e periodo inicial di 14 dia yega prome cu e referendum lo tuma luga ya cu mester cumpli cu loke ta stipula den ley. Loke si nan a palabra ta cu den e segundo periodo por haci e proceso mas cortico. Sr. Pontilius a splica cu si lo bin mas sindicato acerca – ademas di FTA – interesa pa participa den e referendum. E tin un obligacion di sinta cu nan na mesa, manera el a yega di sinta cu ambos partido. Den e caso aki e sindicato mester mustra e comprobante cu tin sosten di e trahadonan.

Paz laboral
Despues cu henter asunto di e realisacion di e referendum a wordo aclaria ta wordo spera cu paz laboral lo bin bek den e planta di television. Mediador di gobierno ta haya cu di mes esaki mester sosode, ya cu e partidonan a papia caba cu rapidamente despues di referendum nan ta bay mesa pa atende cu e problemanan di e trahadonan. “Esey ta nos recomendacion tambe pa atende cu e diferente kehonan cu e trahadonan tin”, el a bisa. E ta haya cu si tin referendum dia 25 di augustus, e ora ey e siman siguiente e partidonan lo por sinta na mesa pa atende cu e kehonan di e trahadonan. Bon Dia Aruba por compronde cu gerencia di TeleAruba pa medio di su abogado kier bin cu cierto condicionnan sin cu ainda e referendum a tuma luga, locual no tabata na grado di sindicato FTA.

Mediador di gobierno a laga sa cu semper dunado di trabou por purba di bin cu condicionnan, pero den e tempo cu nos ta biba, bo no mester tin tanto exigencia. “Nos ta biba den un estado di derecho y e trahadonan ta haci uzo di su derecho di afilia”, segun Sr. Pontilius. Unabes cu sindicato ta representa e trahadonan di e compania nan tin cu reuni cu gerencia pa atende cu e situacion cu a surgi na TeleAruba. E trahado haciendo uzo di nan derecho a busca representacion sindical cerca FTA, pa motibo cu nan tin asuntonan cu nan ta considera cu via un sindicato nan por drecha pa medio di un contracto colectivo (CAO).

E matutino aki ta compronde cu e trahadonan ta uni y masha satisfecho cu pronto lo celebra un referendum pa asina FTA representa nan formalmente. Sinembargo tin rumor persistente cu sindicato di Setar, STT eventualmente ta pretende di participa den e referendum aki. Esaki ta wordo mira como un strategia pa kibra e union entre e trahadonan. Mientras cu mayoria di trahadonan cu derecho di voto ta consciente cu STT ta un sindicato di Setar y no un sindicato di TeleAruba; ya cu nan kier un sindicato independiente cu por bringa pa nan derechonan.