Ta falta mas o menos tres luna pa Aruba bay vota pa un parlamento y gobierno nobo. Presidente di Conseho Electoral Hubert Maduro ta bisa nos cu pa 4 di augustus tin entregamento di lista di partido anto pa dia 25 di augustus Conseho Electoral ta dicidi riba e validez di esakinan.
Bo por registra un partido politico henter aña pero manera cu nos a informa caba, te dia 22 di juni venidero por registra un partido politico pa participa den e eleccion september awo.
Dia 5 di juli e register ta wordo traha anto pa 4 di augustus ta entregamento di lista cu e candidatonan di cada partido politico. E aña aki tur cos a hala un siman mas dilanti compara cu ultimo eleccion. Un gran parti di luna di augustus lo bay pa dicidi riba e listanan.
Lista invalido
Tin algun cos cu por causa cu un lista no ta valido. Na prome luga naturalmente check si e nombernan y adresnan ta corecto. Den e augustus departamento di Censo ta check tur e listanan pa wak si a cumpli cu tur rekisito. “Tambe bo no por ta riba dos lista. Bo tin cu dicidi cua bo ta bay keda riba dje. Pero esey ta tuma den e tres siman ney. Tin comunicacion tambe si tin problema cu e lista. E persona of partido ta haya oportunidad pa drecha su eror te dia 25 di augustus,” sr. Maduro ta bisa. Varios eror chikito por pasa anto a yega di sosode manera por ehempel entrega un lista blanco sin nada riba dje of a haya envelop robes.
