Recientemente durante un conferencia di prensa director di Fundacion Telefon pa Hubentud Aruba James Sneek a anuncia cu e aña aki riba 20 di november e fundacion ta celebra di 25 aña di existencia fundacion y alaves ta celebra Dia Internacional di Derecho di Mucha.

Sneek a recorda cu dia 20 di november 1999 tabata prome biaha cu un mucha na Aruba a haci un yamada na number 131 y a ricibi informacion, sosten emocional y conseho for di un mentor na Telefon pa Hubentud.

El a splica cu e dia aki tin dobel celebracion, no solamente di e 25 aña di 131 y Dia Internacional di Derecho di Mucha, pero tin diferente motibo di celebracion, y un di nan ta informacion.

“Na momento cu un persona siña tocante su derecho e ta siña tambe cu otro persona tambe tin derecho. E ta siña cu su derecho, por ehempel, ta caba caminda esun di e otro ta cuminsa. Pa medio di conocemento di derecho e ta siña respeta otro persona, e ta siña yuda otro persona y e ta siña tambe pa traha den harmonia cu otro persona. Durante 25 aña nos organisacion a crece y awe nos ta hopi contento di esaki,” el a remarca.

El a sigui splica cu banda di loke ta e servicionan di telefon, email y chat, e fundacion a crece y ta brindando actualmente servicionan di charla, tayer y proyecto den scolnan y otro luganan caminda actividad di mucha y hoben ta tuma luga.

Sneek a indica cu Fundacion Telefon pa Hubentud tin aproximadamente 10 proyecto cu e ta ofrece na mucha y hoben. E vision di e fundacion ta cu e mucha y hoben na Aruba ta prepara hunto cu su famia pa tuma e miho decision pa nan bida. E preparacion aki ta encera e informacion, conseho y tambe sosten emocional cu e ta mucha of hoben ta ricibi for di 131.

El resalta cu e 131 ta activo no solamente na Aruba, pero a expande y desde 2022 ta brindando servicio na e isla di Boneiro, Saba y tambe Sint Eustatius. E muchanan di e islanan aki tur dia por yama na e number 918 y ta haya contacto cu e mentor na 131 caminda e ta haya informacion, sosten emocional y conseho.

Shurman Milliard di Fundacion Telefon pa Hubentud Aruba a resalta cu tanto aki na Aruba y internacional por mira cu derechonan di mucha mester haya mas atencion pasobra papiando di derecho di mucha no solamente e muchanan ta haya sa kico e derechonan ta, pero comunidad tambe lo haya sa tocante derechonan di mucha.

E meta ta pa haci e celebracion di dia 20 di november mas grandi cu por pa alcansa mas adulto y tambe profesionalnan di derecho di mucha pa nan tambe demostra nan apoyo na comunidad tocante e derechonan y celebra e conocemento ey.

Milliard a splica cu Dia Internacional di Derecho di Mucha ta bay ser celebra cu diferente scol e aña aki. El a remarca cu e participacion di scolnan a bira mas grandi y e aña aki tin 12 scol cu kier participa y haya mas informacion.

El a resalta cu nan lo yega na e mucha- y hobennan a traves di e proyecto “Get the Message”. Un proyecto diseña specificamente pa a yega na e muchanan di e forma posibel.

El a splica cu e proyecto “Get the Message” ta consisti di cuater pelicula cortico (short movie) cu ta ser selecta y ta peliculanan renombra internacionalmente. A traves di e peliculanan aki e mensahe ta yega mas cerca di e hobennan. Ora nan wak e cuater peliculanan aki, despues di a ricibi e lesnan di Fundacion Telefon pa Hubentud, nan por reconoce e diferente derecho di mucha cu ta bin dilanti den e peliculanan aki.

Pa loke ta yamadanan cu nan ta ricibi, e alcance cu nan tin y solucionnan cu nan ta logra yega na dje, Milliard a splica cu nan ta haya diferente yamada na e liña di telefon 131 y banda di esey nan tin tambe cu e charlanan cu nan ta duna, e proyectonan cu nos ta ofrece, no solamente pa e mucha, tata of mama, pero tambe profesionalnan.

“Tur persona cu ta contact Telefon pa Hubentud ta tuma e prome stap y e prome stap ta papia tocante kico nos ta sinti paden, kico nos kier pa laga cambia den nos bida y con nos kier haya un solucion den esey,” el a resalta.

Milliard a subraya cu nan ta alcansa 100% di e personanan cu tuma contacto cu Telefon pa Hubentud pa tuma e siguiente paso den nan caminda pa bira miho y sali for di e situacion cu nan ta aden. El a indica cu Telefon cu Hubentud y su partnernan na Aruba ta verwijs personanan aki na unda nan mester ta, laga nan sa unda pa bay y cual ta e camindanan cu por cana den e veld social aki na Aruba.

Pa loke ta e temanan, of situacionnan cu ta bin mas hopi dilanti na e fundacion, el a splica cu pa 25 aña Telefon pa Hubentud tin un top cinco di tema, preocupacion- y situacionnan cu nan ta wak ta bin dilanti a traves di e yamadanan na number 131.

El a remarca cu 25 aña pasa y te awendia ainda termento ta un topico cu ta bin hopi dilanti. E fundacion ta ofrece tur dia charla na diferente scol y ta haci mas cu 220 charla tocante diferente topico y un di e topiconan cardinal semper ta termento.

Otro topico cu den e ultimo tres aña a aumenta ta situacion na cas. Esaki por tin di haber cu divorcio, e por ta relaciona cu scol, conexion cu mama of tata, e falta di un tata de nan bida, entre otro, ta aspectonan cu ta bin dilanti.

Algun otro topico cu ta preocupante entre hobennan tin di haber cu e ambiente social, con e salud mental ta, con e hobennan por relaha y tambe con nan por tin un balans entre scol of trabou y nan bida social. Esey, Milliard a indica, tambe nan ta mira ta bin dilanti frecuentemente den e ultimo añanan.

Soledad tambe ta un topico cu ta bin dilanti bastante. El a splica cu hoben- of hobennan adulto cu ta riba nan mes pa un temporada largo tin falta di comunicacion. Adicionalmente e sentimento cu nan ta parti di comunidad ta un aspecto cu e fundacion a tuma nota cu a bay un tiki atras den e yamadanan.

“Door di contacta cu Telefon pa Hubentud bo toch tin un hende pa papia cune, un hende cu kier scucha bo, un oido pa bo emocionnan tanto positivo como negativo. Cualkier yamada nos ta tuma na serio pa asina e persona por ser yuda y sali di e situacion cu e por ta aden,” Milliard a enfatisa.