Minister Plenipotenciario mr. Ady Thijsen a ricibi for di e studiante Destiny Arends e rapport di e encuesta estudiantil 2024 organisa pa Gabinete di Aruba. A tene un encuesta bao di 175 studiante Arubiano na Hulanda pa asina haya un indicacion di e retonan cu e studiante Arubiano ta encontra na Hulanda.

E analisis di e encuesta a revela diferente reto clave y a brinda un bista cla pa loke ta e experencia di e studiante Arubiano na Hulanda. E transicion di Aruba pa Hulanda pa sigui un educacion avansa ta presenta un cantidad di retonan academico, social, financiero y cultural. Otro reto ta falta di informacion ora kier traha na Hulanda y e belasting cu mester paga. Algun otro reto ta e problemanan mental cu ta surgi a base di soledad, shock cultural, discriminacion y no bay bon na scol. Pa loke ta e problema di haya cas pa biba hopi studiante tabatin dificultad pa haya un camber y mayoria a indica cu nan ta paga entre 400 pa 800 euro pa un camber. A analisa tur e retonan aki ta crucial pa desaroya strategianan pa un mihor sosten na studiantenan.

Na prome lugar e encuesta a indica cu un cantidad significante di studiante no ta sinti cu nan tabata prepara riba e nivel academico pa e cumpli cu e demandanan di un estudio na Hulanda. No ta domina e idioma di Hulandes suficiente ta forma un barera hopi grandi. Adicional na esaki, e cambio di e manera di haya les na Aruba na esun di Hulanda cu ta mas basa riba “self-study” ta trece dificultad pa hopi studiante. Pa adresa esaki, lo mester bin cu mas training di idioma y suministra nan cu mas informacion riba expectativanan academico pa facilita e preparacion di e studiante.

Na di dos lugar, un cantidad substancial di studiante ta indica cu nan ta haya falta di mas informacion prome cu nan bin Hulanda. E encuesta ta mustra cu e punto primario di informacion ta e decanonan na scol, mentoren na Hulanda, Departamento di Enseñansa y amigo y famia. Eleva e calidad y accesibilidad di informacion, manera organisa webinars y sesion di informacion, lo brinda beneficionan grandi na e studiante. Mayoria studiante a indica di ta hopi contento cu e guia cu nan ta haya di e mentornan y a indica cu ta esencial pa mantene e sosten continuo y guia di e mentor pa un periodo mas largo cu un aña.

Punto tres den e conclusionnan ta indica cu e reto significante ta pa haya acomodacion apropia, na unda studiantenan ta enfrenta listanan di espera hopi largo, prijs di huur caro y hopi casonan di estafa cu scammers. E hecho cu no por mira e acomodacion y hopi competencia pa acomodacionnan pagabel, ta haci e situacion aun mas dificil. Recomendacionnan por ta cu lo mester bin cu mas sosten den buskeda di acomodacion, zorg pa e studiante inscribi su mes hopi tempran riba websitenan pa acomodacion y atende e problema di acomodacion pagabel.

Di cuater punto ta mustra cu hopi studiante ta traha mientras cu nan ta studia pa asina por maneha e costo di bida halto. E encuesta ta revela cu studiante ta traha den diferente sector, sinembargo e maneho di nan cartera ta keda un reto. Mehora e guia financiero y duna servicio di sosten por yuda studiante pa maneha nan situacion financiero mihor.

Por ultimo e encuesta ta mustra cu un proporcion significante di studiante tin aversion pa regresa Aruba asina cu nan termina nan estudio. Un di e rasonnan clave ta e deseo di paga back nan debe den euro y salarionan mas halto na Hulanda compara cu Aruba. Tambe nan ta bisa di ta desea di haya mas experencia di trabao na Hulanda. Posibilidad na atende e preocupacionnan aki por sinta den ofrece incentiva manera descuento riba e fiansa di estudio, opcion di cas na Aruba y oportunidad di trabao riba e nivel cu nan a studia p’e. Esakinan ta puntonan cu por encurasha studiantenan pa bay bek Aruba.

Grupo di bursalen 2024
Despues di varios luna di anticipacion y preparacion e momento grandi a yega pa studiantenan tuma e gran paso di sigui cu nan estudio. Algun di nan aki den region mes manera na Curaҫao, Canada, Puerto Rico of Merca, mientras algun ta scoge pa sigui aki na Universidad di Aruba of IPA. E gran mayoria sinembargo ta keda scoge pa bay Madre Patria Hulanda.

En total, Minister di Enseñansa y Deporte hunto cu Minister di Finanzas y Cultura a otorga 247 fiansa pa sigui cu un estudio den exterior. E cantidad di studiante cu ta sigui cu nan estudio den exterior ta reparti di e siguiente forma:

En total tin 207 studiante cu ta bay sigui cu nan estudio na Hulanda di cual 118 ta haci uso di e asina yama Arubalening Reisproduct. Esaki ta esnan cu ta bula riba e vuelonan organisa. E studiantenan cu a bay biba na Amsterdam, Arnhem, Den Bosch, Dronten, Enschede, Maastricht, Sittard, Nijmegen, Rotterdam, Tilburg, Utrecht, Wageningen y Zwolle a sali diadomingo ultimo riba e vuelo KL 767 di KLM rumbo pa Amsterdam, Hulanda. En total tabatin 58 studiante riba e vuelo aki.

E studiantenan cu a bay biba na Breda, Delft, Den Haag, Eindhoven, Gouda, Groningen, Leeuwarden y Leiden ta sali rumbo pa Hulanda dialuna 5 ultimo riba vuelo KL 765 di KLM. En total tabatin 60 studiante riba e vuelo aki.

Pa locual ta trata otro pais, Seccion di Studiefaciliteiten ta informa cu tin 19 studiante cu ta bay sigui nan estudio na Estados Unidos, 7 na Canada, 5 na Curaҫao, 4 na Spaña y 1 na Puerto Rico.

Pa Aruba tin en total 65 fiansa otorga pa Minister di Enseñansa y Deporte hunto cu Minister di Finanzas y Cultura na studiantenan cu ta sigui nan estudio na Universidad di Aruba, IPA of EPI.

Banda di esaki tin e studiantenan cu ta bayendo sigui nan estudio na Hulanda sin Arubalening, e asina yama Freemovers. Seccion di Studiefaciliteiten no tin un bista di cuanto studiante exacto ta trata akinan, pero di e grupo aki 25 freemovers a acerca Cas di Aruba pa participa den e opvangweek y 5 freemovers ta bayendo riba e vuelo organisa pa Aruba.

Fuera di traha duro pa logra finalisa nan estudio pa por sigui cu nan proximo carera academico sea na Aruba of den exterior, studiantenan tabatin hopi pa prepara.

Un di e cosnan mas dificil sigur ta busca vivienda na Hulanda, cual no ta un problema unicamente pa esnan internacional pero tambe pa studiantenan di Hulanda mes. Mayoria di nos studiantenan a logra haya un camber caba y algun falta un camber ainda pero ta premira cu nan lo keda cla tambe. Seccion di Studiefaciliteiten ta desea di haci uso di e oportunidad aki pa gradici SSC di Corsou cu a yuda Aruba e aña aki cu 14 camber den e region di Den Haag.