Den un investigacion cu a dura basta largo, y den cual posiblemente lo tin consecuencia laboral pa un agente policial, fiscal a pidi pa reportero Nelson ‘Speed’ Andrade di portal 24ora.com haya 240 ora di servicio comunitario y 2 luna di castigo condicional.
Di mainta te atardi a trata e caso y investigacion yama Kinikini, cual a envolve varios sospechoso, tanto di prensa como di banda policial. Ayera tres sospechoso a presenta dilanti un hues femenino; nan ta: Espinoza, Andrade y un agente policial emplea pa Cuerpo Policial (KPA) bou di Bureau Integriteit en Veiligheid (BIV) di fam Rasmijn.
Mientras fiscal a exigi e castigo ariba menciona pa e reportero principal di portal 24ora.com, a pidi e mesun castigo aki pa agente policial Rasmijn ademas cu e consecuencia cu e no lo mag sigui traha na Cuerpo Policial, mirando cu e lo mester a sa, trahando den e oficina di integridad, cu no tin mag di fia ekiponan di polis na tercer partido. Mientrastanto a pidi 180 ora pa e otro periodista di 24ora.com, esta Espinoza.
Instalacion di aplicacion pa manda noticia policial pa colega di prensa
Durante tratamento di e echonan a menciona cu e reportero Espinoza lo a haya portofon P012 di su colega Speed Andrade cu e instruccion pa ‘no mustra esaki publicamente’ y pa ta cuidadoso cu e uzo.
Pa fiscal, esaki tabata un di e puntonan dicon a pidi un straf mas halto pa Andrade compara cu Espinoza, mirando cu Andrade ‘lo tabata sa cu no tin mag di tende riba frecuencia di polis’. Ademas a haci mencion di instalacion di un aplicacion pa manda noticia policial na coleganan di prensa riba un laptop na cas di un mecanico emplea pa KPA, L. Werleman. Aki ta unda Andrade a encarga Espinoza pa instala e aplicacion mirando cu e tin e conocemento tecnico.
Pa un otro acusado, esta agente policial Rasmijn, a declara cu e portofon nunca lo a sali di su oficina na BIV, sinembargo fiscal a cuestiona esaki mirando cu a mira den e portofon su GPS y e portofon P012 a registra den areanan cu Espinoza ta frecuenta. Esaki ta concorda tambe cu Espinoza su declaracionnan.
Fiscal rabia pa via di mancha institucion Arubiano su nomber internacionalmente
Mester menciona cu mientras fiscal tabata lesando su rekisitorio, el a hisa su tono di bos y mira e acusadonan intensamente, pasobra OM ta di opinion cu Espinoza, kende ta vice presidente di libertad di prensa na Sociedad Interamericano di Prensa (SIP), lo a gaña SIP, cual a conduci na nan traha un rapport cu ta ‘completamente falso’, reflehando e detencion di Espinoza.
Defensa di ambos acusado, den persona di abogado Chris Lejuez, durante e tratamento a trece prueba adicional cu e personanan cu a investiga e caso, fam Tromp a publica algo riba Facebook unda ta bisa: “Ami ta kere den nos sistema hudicial. Un cos si ta sigur. Un hende cu no a nace akinan no lo pone mi duda den nos sistema hudicial.”
E rason dicon a trece esaki dilanti ta pa comproba cu fiscal ta kere cu e investigacionnan ta bay completamente corecto, sin ningun envolvimento politico, cual riba Aruba, mirando cu tin 2 partido principal, ta un expectativa irealistico. “Fiscal ta fout den kere cu e Landsrecherche ta intachabel. Mi a trece prueba pa comproba cu esaki no t’asina.”
