24 caso pa luna di mucha maltrata y interna den hospital; Alrededor di 93% di proyecto di Social Crisis Plan ta den implementacion

Minister di Asunto Social, Glenbert Croes a entrega na miembronan di parlamento un rapport riba e di dos reportahe di e implementacion of desaroyo di e Plan Crisis Social. E intencion –segun e mandatario– ta di por duna un reportahe completo na e organo legislativo tocante e progreso di e plan aki. Un esfuerso coordina bou cuater ministerio, esta enseñansa, Asuntonan Social, Salubridad Publico y Husticia.

E reporte ta contene un bista financiero di e departamento di Finansa riba con e gastonan ta bayendo, y un panorama riba e parti di personal cu ta demanda e implementacion di e Plan Crisis Social aki. Pero tambe e programanan y resultadonan: cuanto hende a wordo selecciona y den cual categoria. Igualmente proyeccion y conclusionnan y recomendacionnan.

E mandatario a presenta un panorama social lamentabel di nos comunidad. Segun nan cifranan, a raporta 24 caso pa luna di mucha cu ta wordo maltrata y interna den hospital pa asistencia. Pero tin hopi caso -segun e mandatario- cu no ta wordo registra. El a menciona un averahe di 150 caso di abuso domestico. Generalmente e cifranan aki ta subi durante e dianan di fiesta. Igualmente el a indica cu e nivel di pobresa ta halto den nos comunidad. El a yama esaki como un ‘realidad tragico’ cu mester atende cu urgencia.

Den e rapport tocante implementacion of desaroyo di e Plan Crisis Social tin un detaye referiendo na e 31 proyecto cu ta forma parti integral di e plan aki. El a wordo traha door di departamentonan di Finansa, di Asunto Social,y di Recurso Humano (DRH).

Croes a informa Parlamento cu un 93% di e proyectonan di e Social Crisis Plan ta den implementacion. Te cu fin di juni ultimo, 61% di e proyectonan aki ta andando excepcionalmente. Pa loke ta e full e personal recluta pa traha den e plan aki, te aworaki -segun e mandatario- nan a tuma 39 persona profesional.

“Kier men ora cu nan ta papia cu e Plan Crisis Social lo ta un capa pa djis tuma hendenan na servicio, ta pa purba di desacredita e trabou cu nos ta bin haciendo”, el a declara dilanti parlamento.

El a splica cu den e plan aki ta wordo contrata e miho expertonan disponibel den un forma temporal pa atende cu emergencia social. Ya cu nos tin un tardansa den diferente instancia cu ta atende cu problema social y cu nan mester asisti.

Pa loke ta trata e presupuesto di e Plan Crisis Social, 28% di e presupuesto, di 33 miyon florin pa tres aña, te awor a wordo uza. “No ta cuestion cu nos ta regala placa”, el a bisa. E mandatario a remarca cu ta existi un compromiso serio entre e instancia cu ta haya fondo cu gobierno, pa sigura cu e fondo cu e instancia ta haya, mester tin un plan cu ta midi nan resultado.

Pa mita di otro aña, gobierno lo ta full cla cu e introduccion di e ‘Codigo di Seguridad’, ya cu tin algun ‘bottleneck’ cu nan ta atendiendo pa su implementacion.

Pa Croes, mita di otro aña lo bira un tempo di reflexion pa midi y evalua con leu nan lo por continua cu e plan di emergencia den e Plan Crisis Social. Nan no sa ainda si ta dos, tres of cuater aña pa cumpli cu tur e metanan di e plan aki. Pero principalmente nan mester laga un fundeshi atras pa fortifica e diferente instancia, pa nan ta actualisa pa atende inmediatamente di un forma structura, cualkier emergencia pa garantisa, entre otro, e siguridad di e mucha, hoben y famianan. Si nan por logra esaki, e Plan Crisis Social por a logra su meta, segun e mandatario.