Diescuatro universidad di varios estado a uni den un esfuerso cu ya a logra incrementa te 51 e cantidad di studiante di e Scol di Derecho di Universidad di Puerto Rico (UPR), cu lo sigui cu nan estudio na Merca, y e cifra aki por subi ainda.
Asina e presidente di e Asociacion Puertorriqueño di Abogado di Florida, Anthony Suárez, a divulga ayera, anunciando e creacion di e programa Student Temporary Assistance and Relocating Program(STAR), cual ta promove cu e studiantenan di e isla por continua nan programa academico den Derecho na Estadonan Uni, mientras ta normalisa e operacion academico di e universidadnan despues di e desastre cu horcan Maria a laga atras.
Pareu cu e universidadnan bolbe na nan actividadnan academico regular, nan mester bolbe, el a splica.
“No tur noticia cu ta saliendo di Puerto Rico ta negativo,” e abogado a bisa anunciando e incremento di e cantidad di studiante cu lo admiti na universidadnan Mericano. Di e 14 institucionnan di educacion superior cu a expresa interes pa ricibi studiante puertorriqueño, ya cuatro a formalisa acuerdo cu Scol di Derecho di Universidad di Puerto Rico.
Esakinan ta e scolnan di ley di Universidad di Touro y Universidad di Buffalo, na New York; e Scol di Ley di Universidad di Pittsburg; y Universidad Estatal di Florida.
Suárez a splica cu esaki ta un proceso interuniversitario, es decir, cu ta coordina entre un universidad y otro y no ta e idea cu studiantenan mes ta coordina di forma independiente algun intercambio estudiantil. Den e caso aki, el a splica cu e Scol di Derecho di UPR ta selecciona e studiantenan y ta coordina pa completa nan admision.
Loke el a aclara ta cu ta trata di studiante di segundo y tercer aña den e facultad ey y cu e universidadnan recipiente no lo cobra costo di matricula. Ademas, a acorda cu ta cubri costo di alimento.
“Algundi e studiantenan lo yega aki sin nada, sin placa ni paña. Pesey nos a crea e programa STAR, pa recauda fondo y yuda nan cu e gastonan di nan traslado di Puerto Rico pa Merca, yuda nan cumpra buki y computer,” Suárez a bisa, indicando cu e asociacionnan di studiante hispano den algun di e centronan educativo a expresa nan interes pa adopta e studiantenan cu yega pa duna nan apoyo tambe.
STAR lo recauda donacion cu nan ta obtene di profesionalnan di Derecho, entre otro esnan experto. “Nos lo bay na e abogadonan cu boso ta mira presentando nan mes na television. Nos ta bay toca na nan porta pa nan yuda.”
E otro universidadnan cu a expresa interes pa ricibi studiante puertorriqueño ta University of Connecticut, Florida A&M University, University of Florida, Barry University, Florida International University School of Law, Nova Southeastern University School of Law, University of Missouri School of Law, St. Thomas University School of Law, Columbia University School of Law, George Washington University School of Law, Vermont University School of Law, Pennsylvania State University School of Law y la Iowa University School of Law.
