Diasabra anochi ultimo riba rotonde den caya principal di San Nicolas a wordo celebra e apertura di oficina di Refineria di Aruba (RdA). Durante e anochi por a nota cu organisa un evento priva pa conmemora e apertura, mientras cu habitantenan di San Nicolas tabata sinta p’afo pa wak e show.

E oficina situa den edificio di ex-DOOV a wordo dorna cu luz di colo na banda di edificio y candela riba e dak. Durante e anochi varios show di baile y musica a wordo presenta, pa ‘conmemora e diferente nacionalidadnan cu a traha pa hiba nos pais dilanti’. Publico presente por a tende durante e anochi un storia cu a detaya e historia di e refineria Lago na Aruba y historia di San Nicolas en general.

Area publico y priva

Algun prensa a purba drenta e area di e evento dorna pa mesanan blanco y stoel pa invitadonan, pero siguridad di e evento a splica cu prensa no a wordo invita na e evento. Pues e potretnan cu a wordo tuma ta for di punto di bista di e area asigna pa publico en general. Sinembargo nos reportero a tuma nota di personanan den e area priva cu a wordo invita specificamente pa tuma potret.

Esunnan cu si a wordo invita tabata entre otro ehecutivonan di compania Citgo y ehecutivonan di RdA mes. Durante e anochi minister demisionario di turismo, transporte, energia y medio ambiente Mike de Meza a duna un discurso.

E area pa publico tabata situa na e parke dilanti oficina di ATA. Publico presente por a busca cuminda y bebida traha pa localnan bou tentnan den parkeerplaats dilanti Arubus. Tambe nan por a tende e presentacionnan bon cla via e sistema di speaker cu a wordo produci pa e evento. Aunke cu e bailenan no tabata visibel directamente, e produccion a percura pa e publico por a weita esaki riba un pantaya grandi. Bon Dia a acerca varios persona cu a yega na e evento pa un comentario.

Habitantenan ta mustra apoyo y cuestiona e apertura

Ora nos a acerca un grupo di persona sinta na canto di caminda pa comentario tocante e evento, nan a bisa cu “nos no por comenta riba e evento priva eyden, solamente akifo”. Pues nan a splica cu nan no tabata na altura cu lo tin un parti priva y un parti publico. “Nan a bisa nos pa bin awe nochi paso tin un evento, pero nos a kere cu lo ta free for all. Nada a wordo bisa di un area separa pa publico. Pero toch nos ta akifo patras di baricada pa apoya nan eyden”.

Varios persona cu nos a acerca durante e anochi a comenta cu nan a presenta na e evento pa expresa nan solidaridad cu comunidad di San Nicolas. Un di e personanan aki tabata Mark Anthony Louis.

Sr. Louis a declara na reportero di Bon Dia, “mi ta wak cu nan ta purbando di haci hopi cos na San Nicolas. Tanto den sentido cultural como economico. P’esey mi ta sinti bon y orguyoso pa apoya e esfuersonan, pasobra mi tambe ta biba kinan.”

Aunke cu sr. Louis ta mustra su apoyo, e ta conta nos cu e tin duda si e refineria mes lo por habri pronto. Den su opinion e refineria a cera pa problemanan politico y cu e no ta den estado pa habri bek.

“Mi tabata eyden un par di luna pasa. Mi a wak tur e trabou cu tabata falta ainda, y p’ami e lo ta imposibel pa habri pronto”. Pa tur e dañonan cu sr. Louis a weita den e compleho di refineria, e no ta kere cu e refineria lo por habri pa un par di aña mas.