Ayera tardi den Parlamento di Aruba a tuma luga e iniciacion di 22 hoben den Stichting Parlamento Hubenil di Aruba. Presidente di Stichting Parlamento Hubenil, Dave Martinus, a splica tocante e celebracion aki y kico e ta nifica pa e organisacion.

Cu e iniciacion di e hobennan aki, Martinus a remarca, nan ta bay cuminsa un trayectorio nobo caminda e organisacion ta bay zorg pa nan drenta den e area di desaroyo. Parlamento Hubenil ta para pa defende e tratado di derecho di mucha, pero alabes tambe ta yuda e hobennan nan den nan desaroyo como hoben. “Awe ta un dia cu ta marca e inicio di esaki y p’esey esaki ta un dia hopi importante,” el a enfatisa.

Martinus a sigui splica cu Parlamento Hubenil y Parlamento di Aruba no directamente ta relata na otro, pero e idea ta si pa yuda e hoben desaroya su mes pa na momento cu e haci escogencia di uni na Parlamento, e ta un parlamentario cu ta forma, desaroya y cu tin e habilidad.

El a duna como ehemplo habilidad nan simpel cu tin ora e ser humano falta, habilidad manera con pa debati na un manera respetuoso, scucha otro su opinion, entre otro. Pero mas importante, el a resalta, ta pa e hobennan por desaroya nan mes pa nan por trece nan mesun bos dilanti sin cu nan mester keda minimalisa den loke cu nan ta pensa of kico ta nan opinion.

“Na final di dia nos ta desea pa parlamentarionan tambe berdaderamente scucha kico ta nan bos y kico ta nan pensamento, eynan ta caminda cu nos kier yega,” Martinus a subraya.

Pa e hobennan aki por forma parti di Parlamento Hubenil di Aruba, e presidente di e organisacion a splica cu e prome cos ta cu ora nan uni cu Parlamento Hubenil tin cantidad di curso cu nan mester pasa, un cantidad di proyectonan cu nan ta traha den dje.

Den e caso aki, el a detaya, nan a cuminsa cu un structura mas amplio caminda cu e hobennan ta bay pasa den diferente trayectorio y na final keda instala tambe como un parlamentario hubenil.

Pa loke ta despues di e iniciacion, Martinus a splica cu tin hopi cos pa e hobennan traha riba dje, entre otro diferente proyecto. Un di e proyectonan cu el a menciona ta un proyecto di enseñansa cu e organisacion tin hunto cu gobierno mes y aki e hobennan ta bay haya e oportunidad di ehecuta e proyecto caminda cu nan opinion ta bay bin dilanti.

“Nos ta hopi contento cu Gobierno di Aruba a duna nan e oportunidad pa por traha riba esaki y cu ta sostene esaki. Alabes nos ta haya hopi great cu nos ta ricibi di tanto e mayornan como e parlamentarionan mes,” el a bisa.

Por ultimo, Martinus a enfatisa cu e iniciacion ta nifica e ponemento di e prome piedra caminda cu e hoben ta bay traha riba su futuro, traha riba su desaroyo pa e ta un hende respetuoso, un hende digno pa representa su pais y representa e hobennan na Aruba.

“Mi kier duna pabien na e hobennan y alabes invita tur cu ta interesa tambe pa uni,” el a finalisa.

Misha Raymond, parlamentario fraccion Raiz tabata presenta durante e inicacion aki. El a indica cu p’e personalmente esaki ta prome biaha cu e ta wak esaki: “Mi ta sumamente orguyoso di wak cuanto hoben ta participa na Parlamento Hubenil. Mi ta kere ta duna un bon sentimento pa wak tur e stoelnan yen cu hobennan cu tin aspiracion pa bira politico, drenta e arena politico, pero tambe pa eherce e trabou unda pueblo ta pone bo den e stoel aki,” el a expresa.

Durante e ceremonia, e hobennan a presenta ta diferente articulo di tratado di mucha, Raymond a splica cu durante su un aña y mey den Parlamento e mes a menciona varios biaha diferente articulo di e tratado aki y e ta sumamente orguyoso pa wak cu Parlamento Hubenil ta hiba e proceso a base di e tratado aki pasobra “no solamente falta implementacion di hopi di e articulonan aki, pero nan ta para riba e principionan di kico e articulo nan aki ta nifica pa nan por haci nan trabou.”

Hendrick Tevreden, parlamentario fraccion MEP, tambe a presencia e bunita ceremonia aki y e tabata hopi impresiona cu e celebracion: “E ta un momento impresionante pasobra bo ta mira hobennan cu ta propone nan mes pa wordo empodera, pa wordo edifica, pa wordo forma pa asina den futuro kisas nan lo hiba un di e asientonan den Parlamento di Aruba pa por sirbi nan pais na e organo mas halto di pais Aruba,” el remarca.

Pa loke ta e constitucion di e organisacion cu ta basa riba e tratado di mucha, e parlamentario a resalta cu parlamento mes tin hopi aña caba ta atendiendo cu e tratado di derecho di mucha y cu e punto di derecho di mucha a bira punto special di enfoke pa Gobierno di Aruba.

“Parlamento di Aruba sigur a haci su best, a avansa leynan, a presiona presupuestonan, sociaal crisisplan a bin aden, un topico cu nos ta hopi conoci cune,” el a agrega.

Por ultimo el a enfatisa cu Parlamento Hubenil ta bringa firmemente pa e puntonan di tratado di derecho di mucha wordo reconoci mas y mas na Aruba y den reino en general. Como parlamentario el a ratifica cu nan ta apoya nan sigur y cu nan ta kere esey ta e caminda cu tanto como hoben como adulto mester percura pa sigui enfoca riba dje y purba na laga e derecho nan aki resona y wordo biba den comunidad di Aruba.