Manera ta conoci dia 1 di juli a drenta na vigor e ley di privatisacion di plantanan di RWZI como tambe incinerator na Parkietenbos. Hunto cu e ley aki tambe mester a drenta na vigor e cobransa di e sustainability fee di 20 dollar na turistanan, cual a tarda algun dia pa drenta den efecto. Aworaki ta cuestiona pakico ta cobrando 22.75 dollar, en bes di 20 dollar manera cu a anuncia inicialmente.

Un usuario riba red social a publica un potret di un recibo di transaccion di pago di e sustainability fee. Segun gobierno a indica, e sustainability fee ta un cobransa di 20 dollar na turista, pero den e potret por mira cu e recibo ta indica 22.75 dollar. Esaki a causa algun reaccion y ciudadanonan ta cuestiona pakico e 2.75 dollar extra ey ta.

No ta un secreto cu e problema di RWZI, specificamente e planta di Bubali Plas ta hopi grave. Gobierno di Aruba, segun prome minister Evelyn Wever-Croes a indica na varios ocasion, a purba di inverti den un solucion pa e planta, pero nunca esaki por a ser concretisa.

Mirando e problema serio, te cu hasta na cierto momento e planta a yega na e punto di casi explota, gobierno a mira privatisacion di RWZI como e unico solucion structural pa soluciona e problema.

“Mucho of otro opcion no tin. No tin otro opcion na Aruba. Nos a purba di tur manera. Nos a purba di keda cune y drech’e nos mes—no a logra. Nos a logra di privatisa, pero tin cu privatis’e den mannan semi-publico no completamente priva, pa bo tin un poco mas control, y e ora nos a yega na e solucion aki,” prome minister a indica durante un conferencia di prensa na comienso di luna di juni.

E ley a drenta na vigor dia 1 di juli y gobierno a dicidi cu pa cubri e gastonan di e trabaonan cu tin mester tuma luga no ta bay pone un impuesto adicional riba e pueblo di Aruba, pero a scoge e ora pa e impuesto wordo paga solamente pa turistanan. Esaki a bira e cobransa cu turistanan mester paga ora nan yena e ED card pa drenta Aruba, e asina yama sustainability fee.

Gobierno a anuncia cu e sustainability fee aki ta un cobransa di 20 dollar y tin algun excepcion. Por ehempel, muchanan bao 8 aña, residentenan local y esnan cu ta biba na Aruba no mester paga esaki. Ademas bishitantenan cu ta bishita Aruba varios biaha pa aña no mester paga e 20 dollar cada biaha cu nan e bishita e isla ya cu e 20 dollar ta conta pa henter un aña.

E prome contratiempo cu a encontra tabata cu riba dia 1 di juli, dia cu mester a cuminsa cobra e sustainability fee aki na turistanan; esaki no a sucede. Representante di Utilities Aruba N.V. a splica Bon Dia Aruba cu en berdad no a implementa e sistema di cobransa di e sustainability fee riba e fecha stipula pa motibo cu tabatin un retraso den e implementacion di e proceso di pago. Tur no residente, pues turista, mester a yena nan ED Card manera normal y un bes cu e proceso di pago ta implementa, e lo bira visibel den e app.

Aworaki, algun dia despues cu e logra implementa e proceso di pago, un usuario ariba Facebook a publica un potret di un recibo di pago di sustainability fee cual ta indica un pago di 22.75 dollar, 2.75 dollar mas di loke gobierno a anuncia inicialmente.

Ciudadanonan ta señala cu esaki no ta un bon bista pa Aruba. A anuncia un cobransa di 20 dollar y aworaki ta simplemente cobra 22.75 sin detaya pakico e 2.75 dollar extra ey ta. Algun ta indica cu si ta trata di un administration fee of credit card cost, e ta un porcentahe demasiado halto, 13.75%.

Reportera di Bon Dia Aruba a tuma contacto cu Utilities Aruba N.V. pa puntra kico ta e motibo cu ta cobrando 22.75 dollar, en bes di e 20 dollar cu gobierno a indica. Te na momento di ciere di nos edicion no a logra ricibi un contesta for di representante di Utilities Aruba.

E implementacion di e sustainability fee a ricibi diferente critica cuestionando pakico ta e turistanan ta esunnan cu tin cu paga pa por drecha e situacion di RWZI y no e hotelnan mes.

Prome minister a splica cu nan haciele di e forma aki pasobra nan a papia cu e hotelnan tocante esaki, pero hotelnan mes no tabata kier paga.

Inicialmente e ley cu a ser entrega na parlamento tabatin otro financiamento y e financiamento ey tabata pa aumenta e environmental levy, e belasting cu turistanan ta paga caba na hotel pa medio ambiente.

Pero esey, el a indica, no a conta cu sosten y mirando e urgencia y aceptacion mas grandi,

specialmente den e sector turistico, a tuma e decision pa introduci e cobransa di 20 dollar a traves di e ED-Card.

Despues di e anuncio di e introduccion di e sustainability fee, e reaccionnan ariba rednan social tabata dividi. Algun usuario a indica cu nan no tin problema pa paga e suma di 20 dollar, cual ta valido pa henter un aña, si e ta yuda soluciona e problema di e planta, mientras cu otro nan no ta di acuerdo cu esaki y ta pidi pa stop di keda construi tanto hotel cu ta loke ta pone presion ariba e sistema tambe.

“Noticia pa mi, pero un bon idea! Mi no ta worry pa paga. E ta nos turistanan cu ta pone stress

riba e problema di riool” ; “Contento di por yuda den un manera chikito. Nos turistanan tin

impacto positivo y negativo riba e infrastructura di e isla” ; “Mi ta contento pa paga e suma pa

yuda e sistema di riool cu desesperadamente mester di un actualisacion,” ta algun di e

comentarionan positivo.

Di otro banda tin e turistanan cu no ta di acuerdo cu esaki. “Turistanan por stop di bin. Kico nan

ta bay haci? Nan ta cobrando nos demasiado impuesto y mi no tin e confiansa cu e placa ta bay

unda e mester bay” ; “Por ta si bo stop di construi no lo tin un problema” ; “Nos a stima Aruba pa e ultimo 25 añanan, cada aña mas y mas impuesto. Dicon no ta laga e desaroyadornan nobo

paga p’e. No nos cu ta bishitante. Nan ta bay cobra tanto impuesto cu nos ta core cu nos” ;

“Unico cos cu mi sa ta cu si nan sigui agrega impuesto hende no ta bay por bin mas cu un

biaha pa aña,” ta algun di e comentarionan di e usuarionan cu no di acuerdo cu e 20 dollar cu nan

mester paga.

Potret di recibo di pago sustainability fee ta di usuario riba Facebook.