Diasabra ultimo durante un di e conferencianan di prensa cu Gobierno di Aruba ta ofrece tur e dianan aki dos biaha pa dia hunto cu otro instancianan di e crisis team, a trece dilanti un balans di loke ta trata e toque de queda cu te na e momentonan ey tabatin un siman caba.
Fiscal di Ministerio Publico, Yolanda Pronk a splica cu den e prome siman aki un total di 211 persona a wordo deteni te cu diadomingo 6or di mainta, pa no cumpli cu e toque de queda. Ademas a sigura cu 5 negoshi a haya boet pa no cumpli cu e orario di ciere durante e siman aki.
Den inicio di siman, el a trece dilanti cu despues di un siman lo evalua pa wak si ta necesario pa ahusta e sumanan di boet, cu Ministerio Publico internamente a haci esaki y nan a tuma e decision cu e boetnan por lo pronto lo keda di e mesun manera, no ta bay tin cambio den e suma di boet.
Esaki ta nifica cu pa hende cu no ta cumpli cu e toke de queda, e boet ta keda na 1.000 florin y pa negoshinan e boet ta keda 1.500 florin pa negoshinan chikito, 3.000 pa negoshinan mediano y 5.000 florin pa negoshinan grandi.
Di mesun manera, Pronk a menciona cu hende mester recorda cu e boetnan aki por yega te na un maximo di 10.000 florin.
Tambe el a trece dilanti cu minister presidente a anuncia cu ta necesario pa bin cu un medida mas pisa, loke ta trata e ‘Shelter in place’. Di esaki el a enfatisa cu e toque de queda cu ta na vigor desde diasabra 21 maart ta queda vigente, fuera di esey ta bin e shelter in place cu a cuminsa awe den oranan di marduga, es decir tur dos medida lo ta na vigor.
Pa loke ta trata e boetnan di shelter in place, Pronk a remarca cu Ministerio Publico a dicidi cu e boetnan aki ta keda igual na e boetnan cu ta wordo impone pa persona y negoshinan cu no ta cumpli cu e toque de queda.
