E biaha aki no tabatin mucho ceremonia compara cu añanan anterior pa despedi un grupo di 206 studiante cu lo sigui nan estudio superior na Hulanda, memey di un pandemia cu ta afecta mundo henter.

E studiantenan of miho conoci como beursalen a wordo dividi den tres grupo. E prome grupo di 26 studiante a bandona nos isla diasabra ultimo. Ayera otro grupo di 90 studiante a bay pa tera friu cu awor ta den temporada di zomer. E delaster grupo cu e mesun cantidad di studiante di ayera ta biaha awe pa cuminsa un carera y construi un futuro como profesional.

Segun informacion cu Bon Dia Aruba a ricibi for di Aruba Airport Authority (Triple A) N.V. pa loke ta e parti logistico nada a cambia, compara cu e añanan anterior. Cu excepcion cu e aña aki no tabatin ceremonia di despedida. E ta un acto cu ta den man di minister di Enseñansa, Ciencia y Desaroyo Sostenibel Rudy Lampe y Departamento di Enseñansa.

Minister Lampe a dirigi su mensahe den nomber di gobierno di Aruba pa e studiantenan aki haciendo uzo di un video. “Mi ta desea tur nos studiantenan cu ta na punto di subi avion pa Hulanda, un bon biahe,” el a bisa. El a agrega cu mirando cu nos ta den tempo di distanciamento social a dicidi di busca e medio aki pa comunica cu e studiantenan di un forma diferente cu añanan anterior.

E hecho aki -segun e mandatario- ta duna e ‘toke’ di e realidad nobo cu e studiantenan ta bay encontra na Hulanda. E mandatario a adverti na e studiantenan cu estudio online ta bira algo normal y tambe nan lo ripara cu e sociedad ta enfrenta un reto nobo y diferente.

“Boso nan ta representa un generacion cu ta bibando den un mundo nobo cu ta naciendo,” el a bisa. Tambe e mandatario a expresa tur sorto di exito den nan estudio. El a bisa cu tabatin henter un preparacion pa efectua e biahenan aki y funcionario di Arubahuis lo ta atento pa ricibi nan.

Un ambiente di alegria mescla cu tristesa a caracterisa e despedida aki. E hoben J. Nicolas Bennet kende tabata hunto cu su mama cu a bay dispidi di dje, tabata un di e studiantenan cu a bay rumbo pa Enschelde, Hulanda.

E ta un hoben di 25 aña kende a warda un tempo prudente pa cuminsa su estudio den mundo di publicidad, arte grafico, diseño y pelicula. Como studiante e ta consciente cu nan ta biahando den un momento hopi singular pa humanidad.

El a reflexiona si tabata prudente pa bay den e circunstancia actual di coronavirus. Pero el a pensa cu e mester a bay, sino e ta keda mas atras, y e no kier warda mas. Ya caba e tabatin dos aña cu tabata wardando e oportunidad di bay pa logra su soño di bira un profesional den mundo di arte grafico.

E aña aki cu el a dicidi di bay Hulanda, e pandemia a bin. “Ami no ta laga pa esey stroba mi,” e hoben aki a bisa. E ta consciente di tur medida preventivo di higiena y cu mask bisti, el a declara cu e ta tuma tur precaucion y e ta cuida su mes bon, haciendo uzo di tur medida di bio siguridad.