E asesinato di indigena, lidernan social, entre nan hende muhe, y ex-guerrillero di FARC cu a drenta den e proceso di paz cu Gobierno, ta preocupa e Oficina di Alto Comisionado di ONU pa Derechonan Humano (ACNUDH), den su rapport anual di Colombia.
Dia 26 di februari ultimo na Bogota, Oficina di Alto Comisionado di ONU pa Derechonan Humano (ACNUDH) a denuncia cu, den aña 2019, 108 lider social a ser asesina, un porcentahe mas abou compara cu 2018, aña den cual a registra 115.
“Den e 108 caso di asesinato documenta, 75% a sucede den zona rural, 86% na municipio cu un indice di pobresa mas halto cu e media nacional, 91% na municipio cu cifranan di homicidio cu ta indica existencia di violencia permanente y na 98% di e municipio caracterisa pa e presencia di economia ilegal y di ELN, di gruponan violento y criminal”, Alberto Brunori, representante di ACNUDH na Colombia, a sigura.
Segun ONU, e situacion ta registra memey di un spiraal di violencia den algun zona di e pais pa motibo di lucha teritorial entre disidente di FARC, Ejercito de Liberacion Nacional (ELN) y cartelnan di droga, cu ta busca control di cultivo ilegal.
E organisacion defensor di derechonan humano a splica cu, di 108 asesinato registra na 2019, 15 a ser cometi contra hende muhe, lidernan activista, loke ta representa un aumento di casi 50% compara cu 2018.
Tambe, Oficina di Alto Comisionado di ONU pa Derechonan Humano a pidi un restructuracion di polis anti-disturbio ESMAD, pa via di e denuncia di 15 caso di presunto violacion arbitrario di e derecho di bida cometi pa miembronan di ehercito y polis.
Di su banda, Gobierno Colombiano ta señala cu, aunke e cantidad di asesinato mester ta cero, esaki a keda reduci desde e yegada di Ivan Duque na presidencia, na augustus di 2018. Duque ta responsabilisa ELN y disidencia di FARC pa e crimen aki.
