Presidente di Federacion di Trahado di Aruba (FTA), Hubert Dirksz a defini 2018 como un aña di hopi actividad, no solamente riba tereno laboral, sino social, economico, financiero, etc. Como lider di e sindicato mas grandi di Aruba, e ta haya cu sindicalismo ta keda importante riba nos isla. “Sindicato tin derecho di existencia,” el a bisa.

Sindicalismo

E sindicalista ta haya cu den un sistema democratico, no solamente esaki ta wordo expresa na momento di votacion pa eligi nos representantenan den parlamento constitucionalmente cada cuater aña. Sino como sindicato nan tambe ta parti importante den comunidad, cu un rol pa yuda cu e situacion di e trahadonan y e pueblo tambe. E prome rol cu nan tin como sindicato ta percura pa husticia social y mantene un calidad di bida den nos sociedad.

P’esey e ta considera cu na momento cu un sindicato ta acerca un dunado di trabou pa reconoce e derecho di nan trahadonan pa bira miembro di un sindicato, e no mester ta un problema. “Pasobra nos ta keda partner,” el a bisa. E mester tin un relacion di confiansa basa riba balansa di derecho y deber. Kiermen kico ta e deber, pero tambe e derecho mas husto cu mester cumpli cune, y cu tin biaha no ta poni den ley.

Negociacion CAO

Turismo ta wordo considera e pilar economico mas grandi. E sector aki ta duna Aruba mas cu 80% di entrada y ta pone pan ariba mesa. Esey kiermen cu tur loke ta pasa den turismo ta importante pa nos tur. FTA nan miembronan ta un 70% pa 80% di e sector turismo. Nan tin pa aña un 15 negociacion di contracto colectivo (CAO). For di e cantidad di CAO aki, alrededor di 8 ta bin di nos industria turistico. Pa aña, FTA ta haya un cuater hotel grandi of chikito cu nan tin cu negosha cu nan. Pero tambe negoshi cu tin di haber cu turismo, manera casino, restaurant, transporte y comunicacion, etc.

E sector aki, cu ta esun mas grandi, durante aña 2018 FTA ta mira cosnan bon, den sentido di bon CAO firma, y casi no tabatin necesidad pa accion. Tampoco nan tabatin conflicto cu mester di intermediacion di Mediador di Gobierno, pero si cu excepcion di e sector casino.

E sindicalista ta haya cu e negociacion di CAO ta bayendo bon cu aumento husto, pero poniendo atencion tambe riba e parti social di e proteccion di e trahado. Un punto cu presidente di FTA ta haya cu mester atende den e sector di turismo ta su garantia pa futuro.

“Es decir, e producto turistico y e servicio di nos propio trahadonan, y e inversion di e companianan, y e infrastructura di cada un di nan, y e calidad pa no bende nos producto barata. Pero tampoco no bende un producto cu nos no tin,” segun e sindicalista. El a agrega cu si nos ta bende un producto, mester percura pa e t’ey pa ofrece e turista ora e ta yega.

Investigacion sector casino

E aña aki, presidente di FTA ta haya cu e sector casino si ta un problema. E ta considera algo straño, pasobra mientras cu e sector casino ta den e sector turismo cu ta bay bon, casino ta bay malo.

Presidente di FTA ta considera importante pa bin cu un investigacion, pa wak den berdad si e producto casino ta esun cu nos kier di berdad. Pasobra nos por haci’e manera otro paisnan, cu bo ta pone e destinacion como un luga di sosiego, bon trato, pa relaha y bon gastronomia, pero hunto cune nos tin casino.

P’esey e ta haya cu mester evalua bon e producto aki di nos sector turistico, pasobra eynan FTA ta mira basta problema cu ta biniendo for di hopi aña. Pero e aña aki, ainda tin por lo menos tres casino cu FTA no por yega na conclusionnan.

Sector construccion

Otro sector tin di haber cu construccion, cu a cay hopi. Tambe e trahadonan di e sector aki a bay pa otro sindicato, y algun di nan a bin bek. Pero e sector aki ta presenta un situacion delicado, debi na hopi sub- contratista cu no ta traha cu ley, manera mester ta. Tin hopi ‘cheap labor’, y mirando cu Aruba ta un isla limita, nos no ta hayando construccion grandi. Compania grandi ta cuminsa reduci nan personal y cuminsa traha cu sub- contratista, pasobra e costo di operacion ta grandi, y e competencia no ta husto. E ta haya cu si no tin control, mas ilegalidad ta bay tuma luga na Aruba. E sindicalista ta mira cu e punto aki ta bira un reto pa e aña 2019.

Den caso cu ta bin construccion grandi, loke FTA ta ripara ta cu lamentablemente, e contratistanan ta bin di afo. Esaki specialmente na momento di traha caretera, hospital, etc. Aunke ta wordo envolvi compania local, pero mester evita cu e desaroyo economico aki no ta pa nos pais. Mientras cu desaroyo economico mester yuda soluciona e problema di nos pais, y no di otro pafo, segun presidente di FTA. E ta un problema cu e sindicato aki ta mirando particularmente den e sector di construccion.

Den nomber di FTA, sr. Dirksz a expresa su deseo di feliz fin di aña y sigur un aña 2019 productivo y cu sano huicio prevalece. “Na prome luga salud y hopi bendicion pa cada famia. Ohala cu 2019 lo ta miho cu 2018,” el a bisa.