2017 ta na porta di cera y pa loke tin di haber riba tereno laboral tabatin un total di 15 referendum compara cu 2016 cu tabatin 7 referendum.

Mediado di Gobierno, Anselmo Pontilius a bisa cu e cantidad ta fluctua cada aña, y nan ta referendum pidi mayoria pa STA y FTA. Mientras cu ya caba pa 2018 e aña nobo aki ta habri sigur cu por lo menos tres referendum caba. Un prome referendum lo tuma luga pa e compania di electricidad CHS pidi pa FTA pa 10 di januari proximo.

Durante e aña aki nan tabatin diferente intermediacion y actualmente oficina di mediador di gobierno ta trahando un lista di nan den cuadro di nan resumen di fin di aña. Te ainda den e dianan nan tabata atendiendo diferente reunion. E siman aki nan a reuni cu Post N.V of postkantoor, caminda sindicato STA a pidi un referendum. E proceso di referendum aki lo tuma luga unabes cu otro aña ta habri. Tambe diaranson ultimo nan a trata e proceso legal pidi pa sindicato TOPA pa e trahadonan di Aruba Port Authority (APA) N.V.

Ademas durante 2017 tabatin diferente mediacion caminda mediador di gobierno a sinta na mesa cu sindicato STA y gerencia di Elmar. E luna aki ya casi pa cera aña nan a sinta tambe cu FTA pa atende e situacion di e trahadonan di e casino den Riu Antias.
Situacion pa 2018
Sr. Pontilius den su condicion di mediador di gobierno a declara na Bon Dia Aruba cu ta dificil pa pronostica riba 2018. Sinembargo pa e aña cu ta habri lo tin varios contracto colectivo (CAO) den proceso di negociacion. Nan ta cerando aña den cual mediador di gobierno a sinta na mesa cu sindicato ABV y tambe gerencia di Imsan cu ainda ta negociando nan CAO, y nan a pidi e mediador pa sigui compaña e negociacion aki den e prome luna di 2018.

E ta haya cu e parto di trabou di mediacion ta keda imprevesibel pa motibo. Pero e ta kere cu den varios di nan, mediador di gobierno lo ta na mesa mirando con e aña a cera. “Bo no por papia cu tabatin hopi conflicto laboral.”

E ta haya cu esaki ta hopi positivo den sentido cu un di e tarea di mediador di gobierno ta pa tin paz laboral. Pues den e caso aki e partidonan envolvi den un conflicto laboral sa di haya ‘e porta aki nan’. Sr. Pontilius a indica cu semper unda cu nan por ta guia e partidonan pa preveni e conflicto laboral.