E organisacion mundial di salud, WHO, a saca un resumen di tur problemanan di salud cu nan a enfrenta na 2016. Nan ta papia di un aña ‘turbulente’ como cu nan a topa cu bastante crisis nan di malesa y humano. Pero tambe ta menciona logro riba tereno di resistencia anti bacterial y progresa pa yega cubrimento di salud mundialmente.

 

Riba nan website por haya e resumen unda ta pasa e sucesonan mas importante di cada luna. E prome cu nan ta menciona ta e crisis na Siria unda nan a duna asistencia humano pero tambe a apela na gobiernonan pa stop di tira bomb y haci un esfuerso mas grandi pa caba cu e guera.

 

Como suceso importante na februari WHO ta menciona Zika, cu di un pa otro dia a bira un peliger di salud riba nivel internacional. Tambe nan ta pidi gobiernonan pa clasifica e peliculanan unda ta huma pa asina preveni cu muchanan y adolescentenan ta mira esaki.

 

Oido

Na maart WHO ta pone hopi enfasis riba oido como cu hopi mucha ta afecta y un rapport nobo di e organisacion ta mustra cu 60% por wordo evita. Na maart e organisacion di salud tambe ta pidi atencion pa e medio ambiente como cu tin hopi riesgonan manera contaminacion di aire, awa, suela y tambe e cambio di clima cu lo afecta e salud di hopi hende actualmente.

 

Na april tabatin un bon noticia unda WHO por a declara Europa como ‘malaria-free’. Na april nan tambe ta menciona un estudio cu pa cada dollar inverti den cuido pa malesanan mental, lo trece un ganashi di 4 dollar pa motibo cu e salud di hende ta drecha y po reanuda trabou. Na april tambe a pone hopi atencion na diabetis, un malesa cu ta afectando Aruba gravemente. WHO a urgi pa un accion global pa preveni sea combati esaki como cu mas y mas hende ta muri di esaki of tin un perspectiva di bida mas abou.

 

Ebola

Algo positivo a sosode na juni unda a logra di caba cu e outbreak di Ebola cu tabata esun mas grandi na mundo y a costa e bida di mas cu 11.000 hende. Un otro noticia positivo ta cu na september WHO a declara e region di ‘Americas’ liber di sarampi. Finalmente na december WHO tambe a duna conseho riba e test di HIV cu hende mes por haci.

 

E resumen completo por haya riba www.who.int.