Despues di e dianan di fiesta, nos ta ‘back to business’ den e temanan politico principal. E aña nobo ta habri cu e tratamento di presupuesto 2016, cual a keda posterga aña pasa. Tambe por spera debate riba e circunstancianan bao di cual a yega na un acuerdo cu e compania CITGO pa loke ta reapertura di e refineria, cu a laga hopi pregunta habri. Un tema cayente lo ta e condicionnan cu gobierno lo mester bay negocia cu Valero, con lo por yega na e traspaso di refineria na Pais Aruba. Por spera un discusion fuerte tocante e aspecto di kico lo ta e responsabilidad cu lo keda absolvi of no, pa loke ta e limpieza di e tereno y e gastonan grandi relaciona cu esaki. Seguidamente lo surgi e discusion tocante financiamento di henter e operacion aki, ya cu den e formula publica pa gobierno, Aruba lo ta doño y CITGO lo ta lease e instalacion, poniendo claramente e responsabilidad pa rehabilita y percura pa e refineria ta operabel den man di gobierno. Esaki lo ta solamente posibel cu un financiado solido y di bon reputacion, algo dificil pa haya na momento cu henter e sector petrolero ta den e skina robes y ta existi un cautela general pa loke ta inversion.
Pa loke ta e presupuesto; pa un bon analisis ta importante consulta e documentonan al caso di CAFT, esta nan conseho riba e presupuesto suplementario cu a keda aproba prome cu fin di aña, e conseho riba e presupuesto 2016 y e reaccion riba e rapport di gobierno a base di e cifranan financiero di tres kwartaal di 2015. E ultimo aki ta duna un indicacion con gasto y entradanan tabata move yegando na tres cuarto di aña y ta duna un pronostico pa henter e aña. E reportahe aki ta ilustra cu e gastonan ta considerablemente mas grandi y di otro banda e entradanan tabata kedando atras. Den e presupuesto suplementario gobierno a haci uzo di e tecnica di regala su mes un ‘kwijtschelding’ di un debe cu Pais Aruba tabatin cu SVb, pero cu naturalmente den termino real no ta cambia e panorama desfaborabel. Pero tin mas punto cu ta mustra riba un situacion financiero menos bon.
Ta remarcabel cu CAFT ta referi na un calculacion mas reciente di Banco Central unda ta yega na un cifra mas modera pa loke ta e crecemento di GDP den 2015. Esaki ta algo cu nos a trata tambe den edicionnan anterior cu ta indica un ‘slow down’ economico den e di dos parti di aña. Esey automaticamente lo significa cu e comparacion di deficit financiero lo ta cay menos faborabel pa gobierno di Aruba. No ta menciona e cifra nobo di Banco Central y nos no ta mira esey tampoco den un publicacion di Banco Central. En todo caso, a base di e cifranan di CAFT por conclui cu e GDP pa fin di 2015 lo ta un poco bao di e marca di 5000 miyon florin, mientras cu inicialmente tabata conta cu un crecemento di un poco riba e cifra aki, cual lo tabata basa riba e expectativa di un crecemento di 5% nominal, loke ta demasiado optimista. Proyeccion di CAFT (‘worst case scenario’) ta cu e deficit financiero lo ta 4,5% pa 2015, en bes di maximal 3,7% loke tabata e norma pa e aña aki.
Pa aña 2016 CAFT ta di opinion cu mester maneha un crecemento mas modera di 3,5% di GDP, compara cu e 3,8% cu ta uzando di banda di gobierno. Na momento di e debate den parlamento e cifranan real di 2015 lo no ta disponibel ainda, pero mester tene cuenta tambe cu e base cu 2015 lo duna ta considerablemente menos cu loke tabatin pensa inicialmente. Motibo pa preocupacion sigur ta e hecho cu entradanan di gobierno ta kedando atras, loke por resolve solamente aumentando impuesto o controlando gasto na un manera mas severo. Di loke por mira te awor den e presupuesto ta cu no tin un acuerdo entre gobierno y CAFT, cu opinionnan bastante leu for di otro. Naturalmente esey ta trece e pregunta, kico ta bay pasa si e presupuesto aki lo keda aproba manera cu e ta.
Di su banda gobierno di Aruba ta bisa cu nan speransa ta cu e reapertura lo duna cierto beneficio den 2016 caba, aunke e reapertura mes lo ta programa pa aki un aña y mey. Esaki mester crea un panorama financiero mas alentador, cu mas entrada pa gobierno tambe. Pa esey sucede, lo mester traha cu urgencia riba dos asunto primordial. Uno ta e acuerdo cu Valero cual, pa straño cu e por zona, aparentemente nada a ser haci ariba ainda. E otro ta e desafio financiero menciona caba, unda gobierno di Aruba lo mester sali en busca di candidato pa financia eventualmente dos cos: e compra di e refineria, si Valero no ta dispuesto pa laga esey bay pa un suma simbolico; y e financiamento pa por facilita e start up pa uza (parti di) e instalacionnan como upgrader.
