Awe 28 di juli 2022, Peru ta celebrando su 201 aniversario di independencia. Den un entrevista telefonico desde Peru, Giovana Tapia-Guzman, Coordinadora Consular di Peru na Aruba, ta conta di e gran celebracion aki y con su persona a yega Aruba for di Peru.

Tapia-Guzman tin 30 aña bibando na Aruba y tin 17 aña eherciendo e trabao di Coordinadora Consular pasobra na Aruba no tin un consulado di Peru estableci. Tempo cu el a cuminsa cu e funcion aki, nan tabata cay bao di e hurisdiccion di Consulado General di Peru na Venezuela, pero pa motibo di tur e problemanan cu tin na Venezuela, nan a cambia di hurisdiccion y aworaki ta cay bao di e hurisdiccion di Consulado General di Peru na Panama.

Manera ta conoci tur aña e comunidad Peruano ta celebra e fecha di 28 di juli, e aniversario di Peru, un di e fiestanan mas grandi di Peru, y e aña aki ta celebrando 201 aña di independencia.

Tapia-Guzman ta conta cu pa e gran dia aki normalmente e comunidad Peruano ta organisa un feria gastronomico. E aña aki, segun Tapia-Guzman por a compronde, e fiestanan a wordo tuma pa un grupo di deporte, cu ta consisti di residentenan Peruano cu ta realisa campeonatonan di futbol, pa asina nan por organisa un celebracion na honor di nan pais.

El a sigui splica cu normalmente nan ta hisa e bandera di Peru tambe, cu Gobierno di Aruba ta permiti nan haci, pero pa motibo cu e mester a biaha di emergencia pa Peru, e no a ricibi ningun invitacion cu lo bay hisa e bandera manera sa pasa tur e añanan anterior.

E comunidad tabata organisa un misa tambe, na honor di Peru, pero e ta indica cu e mes no ta altura si ta bay tin un misa e aña aki.

Ta conoci cu pa e fecha special aki, gruponan di folklore y cultura di Peru ta sali e presenta e bailenan cultural di e pais. E Coordinadora Consular a splica cu na Aruba tin dos grupo cu ta hiba e cultura di Peru na diferente actividad rond di Aruba, un di nan ta e Fundacion Fiestas Patrias Peruanos y e otro grupo yama Takiri Folklore Peru.

Tapia-Guzman tin 17 aña encarga cu e funcion di Coordinadora Consular di Peru na Aruba y e ta conta cu e grupo Takiti Folklore Peru a cuminsa practicamente hunto cune, incentivando tur e Peruanonan residencia na Aruba pa yuda mustra mas di e cultura Peruano na cada actividad cu nan tabata wordo invita.

Fiestas Patrias Peruanos na Aruba ta un fundacion basta nobo cu tambe ta presenta bailenan tipico y ta un fundacion cu durante e ultimo añanan a bira hopi popular den nan presentacionnan di e cultura di Peru.

Manera el a menciona caba, Tapia-Guzman a yega Aruba 30 aña pasa, y e ta conta cu en realidad el a bin Aruba cu vakantie y durante su vakantie el a conoce su casa cu tabata biba na Aruba e tempo ey, y asina el a dicidi pa keda na Aruba.

Tapia-Guzman a studia comercio internacional y tin dos yiu, un di nan ta studiando na Hulanda cabando su Masters y e otro ta studiando actualmente na Colegio Arubano, VWO.

Por ultimo, Tapia-Guzman ta manda su mensahe como Coordinadora Consular di Peru na Aruba pa henter e comunidad Peruano residencia na Aruba. “Mi ta invita henter e comunidad Peruano pa nan por semper demostra Aruba e educacion cu nos tin, pa nos por tin tambe cada dia un miho bida na Aruba, pa nos integra incluso cu e comunidad Arubiano, locual ta ideal pa por nos tur por biba bon, pa nos tur por biba den paz, pa nos por biba den comunidad. Y mi ta desea henter mi comunidad, for di distancia, cu nan pasa feliz fiesta patria y cu nan por mustra nos cultura, nos gastronomia pa asina incentiva tambe e comunidad Arubiano pa conoce Peru.”