(AP)—Un explosion di municion na un base den e parti suroeste di Cambodia diasabra atardi a mata 20 soldaat y a herida varios otro, segun prome minister Hun Manet a bisa.
Hun Manet a bisa den un publicacion riba Facebook cu e tabata “extremamente sorprendi” ora el a ricibi e noticia di e explosion na e base di provincia Kampong Speu. No ta claro ainda kico a causa esaki.
Imagennan for di e sitio a mustra varios edificio na candela, al menos un cu su dak los, y soldaatnan ricibiendo tratamento den un hospital. Otro potretnan a mustra casnan cu buraco den nan dak.
Cuatro edificio—tres pa deposito y un facilidad di trabao—a ser destrui y varios vehiculo militar a haya daño, segun Col. Youeng Sokhon, un agente militar na e sitio, a bisa den un rapport pa Gen. Mao Sophan, publica riba red social. El a agrega cu 25 cas den pueblo a haya daño tambe.
Cambodia, manera otro paisnan den e region, ta sufriendo for di un ola di calor extendi, y e provincia unda e explosion a tuma luga a registra un temperatura di 39 grado celsius diasabra. Mientras cu temperaturanan halto normalmente no por rementa municion, nan por kibra e stabilidad di explosivonan durante un periodo, cu e riesgo cu un explosion chikito por causa candela y un reaccion di cadena.
Kiripost, un servicio noticiero online, a cita un residente den bisindario bisando cu un explosion grandi a sosode aproximadamente 2:30 di atardi, sigui pa explosionnan mas chikito pa un ora mas. Pheng Kimneang a bisa cu e bentananan di un fabrica den bisindario a kibra, y casnan den tor di un distancia di 1 kilometer a sufri di algun daño menor. Potretnan di e base ta mustra esaki den un tereno grandi, aparentemente cu ningun structura civil cerca.
Hun Manet a ofrece condolencia na e famianan di e soldaatnan y a priminti cu e gobierno lo paga pa nan intiero y provee compensacion pa ambos esnan cu a muri y esnan herida. Un graduado di e U.S. Military Academy na West Point, e tabata un comandante militar prome cu el a ser eligi aña pasa como prome minister, sucediendo su tata Hun Sen, ken a lidera Cambodia pa 38 aña.
