Segun resumen diario di Departamento di Salubridad Publico DVG riba e desaroyo di pandemia di Covid-19 na Aruba, ayera tabatin 20 caso activo.
DVG a informa cu ayera dos persona a recupera mientras cu a registra un total di cuatro caso nobo di Covid-19, e malesa causa pa e virus SARS-CoV-2, di cual tur ta residente. Cu esaki, e cantidad di caso activo a keda na 20. E cantidad di fayecido relaciona cu e malesa no a conoce aumento y a keda na 107.
E cantidad total di testnan ehecuta ayera na e diferente localidadnan na Aruba, entre otro laboratorio di hospital, laboratorionan priva y aeropuerto ta 327 test. Tasa di positividad (‘Positivity rate’) entre nos residentenan ta 13%.
Mientras tanto, e cantidad di persona vacuna ta 65.902, loke ta representa un promedio di 67% di nos poblacion di 18 aña bay ariba.
