Fin di siman ultimo tabata uno tragico pa dos famia cu a bin Aruba pa disfruta di nan dianan di vakantie na unda lamentablemente 2 persona a muri den menos di 24 ora den diferente circunstancia.

Diasabra ultimo, 2 di december den oranan di mainta a bira conoci cu diabierna 1 de december den oranan anochi pa 07:11 central di polis a haya e notificacion di un accidente grave na altura di Citgo Savaneta unda un auto mester a alcansa dos peaton.

Na yegada di patruya na e sitio di e sucedido, a pidi pa ambulance cu maximo urgencia mirando e situacion di un di e victimanan.

Ambulance a presenta na e sitio pa trata e prome victima ken tabata un turista hende homber cu tabata mustra basta grave. Ambulance a stabilic’e y a transporte cu maximo urgencia pa hospital.

E otro victima cu ta un señora turista ken tambe a ricibi basta sla y tambe a ser transporta pa hospital un rato despues.

Specialista di trafico a yega na e sitio como tambe polis tecnico pa cuminsa haci e investigacion.

A bira conoci cu e auto cu a alcansa e dos peaton y a core bay for di e sitio cometiendo loke ta ser yama como “Hit & Run”, despues di un investigacion ‘relampago’ manera Polis di trafico a denomin’e, nan a bin topa cu e auto na un cas na Tamarijn.

Mesora e chauffeur a keda deteni y e auto a ser confisca pa mas investigacion.

Lamentablemente diasabra den oranan di madruga central di polis a haya informacion cu pa 01:00am Dr. Nommerman a anuncia cu e homber turista a fayece. Ta trata di e turista hende homber di inicialnan A.B naci na Merca di 75 aña.

Turista a bira malo na lama y a fayece
 Den otro circunstancia, diasabra 2 di december Cuerpo di Polis a informa mediante un comunicado di prensa cu un otro turista a bira malo den lama y a fayece.

Diasabra mainta pa 11:42 central di polis a haya e notificacion cu un persona lo a bira malo den lama na altura di Tres Trapi y cu no tabata dunando señal di bida.

Mesora a despacha un patruya di polis na e sitio di e sucedido y a pidi ambulance cu maximo urgencia.

Na yegada di polis ta topa cu un grupo di persona na unda ta purba duna prome auxilio na e turista.

Personal di ambulance a trata e turista pero lamentablemente no por a haci nada mas pe.

Personal di Brandweer tambe tabata presente y pa 1.00pm Dr. Texier a constata e morto di e turista masculino I.I. nacionalidad Mericano di 71 aña.

Un otro caso cu a sucede na mei 2023
 Diasabra 27 di mei den oranan di atardi pa 2:13pm central di polis a haya e notificacion cu un turista masculino a bira malo canto di lama y no tabata reacciona.

Central ta despacha patruya di polis na Divi All Inclusive y ta informa ambulance tambe.

Na yegada di polis por a compronde cu e homber turista naci na Merca a sali di lama y bay drumi riba e stoel di beach, despues a cuminsa sinti su mes malo y na dado momento e no a reacciona mas.

Ambulance a yega na e sitio y a cuminsa e procedura pa reanima e turista pero esaki tabata envano.

Pa 3:15pm di e dia ey, Dr. Mungra a constata morto di e turista J.A.F di 72 aña y naci na Merca.

Departamento di slachtofferhulp a presenta pa brinda yudansa na famia di e fayecido.

Caso di maltrato na turista Canades na december 2022
 Tabata dia 26 di december di aña pasa ora e caso di maltrato na un turista Canades a bira conoci debi na maltrato cu a ser cometi pa cuatro persona local contra su persona.

E turista ken tabata di vakantie riba un crucero a ser maltrata despues cu el a mira cu un accidente a tuma luga, e persona tabata na e luga pa e por haci entrega di e auto cu el a huur despues di recore e isla cu su famia y subi bek riba barco crucero Voyager of the Seas di e cual nan tabata pasahero.

Ora e persona a bay wak kico a pasa y si tur cos tabata bon cu esnan cu tabata envolvi den accidente, e hendenan den auto a sali y agredi e turista di un manera severo, el a haya diferente fractura den su cara y su famia a keda traumatisa door di loke a sucede.

Despues di esaki, el a informa cu for di dia cu esaki a tuma luga Cuerpo di Polis y Ministerio Publico a traha duro pa asina resolve e caso aki na unda nan a logra detene cuater persona cu ta trata di dos hende homber y dos hende muhe.

Tabata dia 30 di december di aña pasa ora Cuerpo di Polis a haci e prome detencion di un di e personanan sospechoso den e caso aki, esaki a tuma luga na un cas na Pos Chiquito caminda un dama a keda deteni y un auto a ser confisca.

Dialuna 2 di januari, habriendo e aña nobo departamento di Recherche Oranjestad a bay na un cas na Jan Flemming y a detene e di dos sospechoso di inicialnan T. E. A. B. naci na Aruba di 24 aña.

Pa dia 4 di januari departamento di recherche a detene e di tres sospechoso na mesun cas na Jan Flemming. Tabata trata di e homber inicialnan C.M.E. B. naci na Aruba di 21 aña, e cual ta ruman di e prome sospechoso.

Mesora e sospechosonan a ser hiba warda pa haci mas investigacion, di e cuater persona aki tambe a ser informa cu un di nan a sali liber, ta trata di e mama e cual a keda deteni hunto cu su yiu muhe cu ta e doño di e auto cu a ser usa den incidente aki.

Na comienso di e caso, a bin dilanti un otro informacion tocante con e suceso a tuma luga segun loke por a saca di e prome melding, di esaki vocero di Cuerpo di Polis Lito Lacle a splica cu despues ora investigacion ta tuma luga eynan por saca afo ki informacion tin, despues di e interogacion di e victima a bin sali e historia completo di loke realmente a sucede.

Tocante e motibo di e agresion, Lacle a comenta cu probablemente e sospechosonan a sinti cu e turista a graba nan den nan accident y esey a causa e reaccion di agresion contra e, lo cual tabata un mal interpretacion na unda e victima tabata yamando un car rental pa puntra unda e mester a bay pa entrega e auto cu el a huur e dia ey.

Ta importante pa menciona cu esaki ta casonan cu a sucede cu turistanan ora nan tabata cu vakantie na Aruba, algun di nan por a ser evita, otro no lamentablemente, importante ta pa keda atento, presta atencion na cualkier situacion y preveni ora ta trata di stuur bao efectonan di alcohol den dianan cu ta bin mirando cu nos ta den luna di december.

Potretnan ta ilustrativo.