E casonan di coronavirus (Covid-19) ta sigui aumenta. Ayeratardi a reporta 17 caso, y anochi Minister Presidente Evelyn Wever-Croes a bisa cu e cifra aki a aumenta cu 2 caso mas, pa un total di 19 caso positivo di Covid-19. E dos casonan nobo ta persona local, un a bin recientemente for di Colombia y e otro ta un transmision local.
Mirando cu Aruba ta yegando na e peak di casonan positivo di Covid-19 y ta test mas persona, gobierno hunto cu DVG lo ta informando continuamente di cada caso nobo via nan website: www.arubacovid19.org
E prome mandatario a bisa cu preocupacion cu e cantidad ta aumentando den e ultimo dianan aki, debi na e strategia caminda ta test mas hende. Asina nan por yega mas rapido posibel na e hendenan cu por tin e virus, y evita cu mas hende por resulta contagia. Nan ta sigui aumenta nan test y di e total di 294 test haci te aworaki e 19 caso cu a sali positivo ta representa un 6%.
Ya caba Minister Presidente a laga sa cu, mirando e casonan cu a sigui aumenta, dificilmente nan por suavisa e medidanan actual pa contraresta e virus aki, ya cu e ta sigui plama riba nos isla. Mas bien gobierno hunto cu e crisisteam tin pensa di gradualmente aumenta e medidanan aki.
Un bon noticia cu el a anuncia tin di haci cu ayera e prome grupo cu a bay den cuarentena a cumpli nan 14 dia, y nan no a presenta niun di e sintomanan y nan cuarentena a finalisa. Ta trata di un grupo di empleado di WEB cu tabatin contacto cu e prome pashent cu a resulta positivo cu tabata un Mericano cu a logra recupera caba y a bay su pais back.
