E unico sonrisa cu por mira rond di e edificio cu a kima completo na London (Grenfell Tower) ta e caranan riba e potretnan di esnan cu ainda ta perdi despues di e incidente. E potretnan ta tur caminda, pega riba murayanan of paña di hende canando rond, cada un cu un nomber y un peticion di desesperacion pa mas informacion.
Muchanan, nan mayornan, hobennan , hende di edad y diferente cultura – tur e posters ta refleha e comunidad diverso cu ta yama e parti aki di London nan hogar. Actualmente e dolor di e famianan a transforma den rabia despues cu 30 persona a wordo constata morto diaranson pasa. BBC ta reporta cu polis a bisa nan cu e cantidad awo subi na 58 victima, cu preocupacion cu esaki lo por sigui subi.
Prome Minister Theresa May a wordo yama entre otro un cobarde anto haya critica basta pisa pa no a presenta durante e tragedia. Un manifestacion a surgi diabierna unda hendenan a cuminsa marcha exigiendo contestanan. Un fondo di 5 miyon a wordo anuncia pa yuda cu material di emergencia, cuminda anto paña pa victimanan.
Causa di candela no ta conoci
E candela a wordo reporta na e edifico di 24 piso, Grenfell Tower na North Kensington, 00:54 BST diaranson pasa. Cuarenta truck cu mas o menos 200 bombero a bringa pa purba tuma control di e candela aki. E candela a afecta tur piso di e edificio, cumisando for di e segundo piso bay ariba.
Tin 19 herido den hospital , 10 di nan ta den cuido intensivo. Bomberonan a rescata como 65 persona for di e edificio. Otronan a logra sali riba nan mes. E causa di e candela aki no ta conoci ainda. Experto den candela Elvin Edwards a describi e situacion como un “chimney effect”, agregando cu e biento por a hunga un rol den yuda e candela expande bay ariba.
