Final di januari ultimo, casi 20 sospechoso a wordo sentencia cu boet durante un sesion special di corte fiscal door di Corte den Prome Instancia. En total a sentencia 18 persona cu boet pa motibo cu nan no a haci declaracion di inkomstenbelasting y prima di seguro social di aña 2011 y/of 2012 of no a haci e declaracion dentro di e termino stipula. Ta trata di mas cu Afl. 42.000,- na boet cu den algun caso a wordo imponi bou condicion.
E maneho pa loke ta trata e persecusion penal di e personanan cu no ta haci declaracion of no ta haci declaracion dentro di e termino stipula y cu ta viola ley di belasting, lo wordo intensifica durante e aña aki. Cada 3 pa 4 luna lo presenta e casonan dilanti hues. E prome sesion di corte a tuma lugar na oktober aña pasa. E tempo ey caba a sentencia 20 sospechoso.
Ta bon pa remarca cu ora hues duna un veredicto cu ta indica un castigo, esaki lo tin como consecuencia tambe cu e asina yama ‘strafkaart’ di e persona ta wordo yena cu e castigo ey. Esaki ta algo cu por wordo preveni. Pesey Departamento di Impuesto ta haci un apelacion na su clientenan pa cumpli cu entregamento di e declaracion di inkomstenbelasting of cualkier otro tipo di belasting dentro di e termino stipula pa evita consecuencianan serio y indesea.
