Te cu diahuebs, 18 persona a muri na Peru den un epidemia di dengue, caminda mas di 13 mil caso a ser conta na e zona afecta pa yobida desde cuminsamento di e temporal na Peru, pa e fenomeno di Niño Costero, Ministerio di Salud a informa. Ultimo victimanan cu a ser raporta di e brote di dengue ta dos muhe cu a muri diaranson den un hospital di Piura, Edwar Pozo, Hefe de Epidemiologia di Direccion Regional di Salud a informa.
Un di e muhenan a muri despues di haya su yiu, cu a sobrevivi y cu ta bon di salud, asina e dokter a declara, cu ta traha den e zona, caminda e epicentro di epidemia ta. “E fayecimento di e personanan a tuma lugar na un momento cu e cantidad di caso di dengue ta minimo, despues di hopi control sanitario,” Patricia García, minister di Salud di Peru a splica. Ministerio di Salud a bisa cu na aña 2017 nan tin un total di 13.488 caso di dengue raporta, mayoria di nan na region di Piura. Piura ta e lugar caminda yobida a laga mas daño material durante cuatro prome lunanan di e aña aki. Gobierno a decreta emergencia sanitario na februari cu a pasa y a pone riba caminda hopi campaña masivo pa fumiga cada cas desde luna di april, cu apoyo di forsa arma.
Gobierno ta calcula cu tabata fumiga cerca di 20 mil cas diariamente pa mata e larva di muskita aedes aegypti, e animal cu ta contagia e enfermedad aki. “No ta un pandemia, nos no por bruha termino. Ta un epidemia cu ta controla,” minister Patricia Garcia a afirma, mientras e tabata yama tur hende pa mantene calma. Hopi habitante tabata pensa cu e enfermedad ta for di control y no ta asina.
