Un hues Peruano a ordena prizon preventivo durante 18 luna pa gobernador di region El Callao, Felix Moreno, mientras e ta bao investigacion pa supuestamente haya soborno for di e empresa Brasileño Odebrecht, pa asina e empresa constructor di Brasil haya e contrato di obra di construccion di un autovia na Peru.

Despues di su audiencia di 10 ora, e magistrado Ricardo Manrique, cu ta dirigi e di tres husgado di investigacion preparatorio nacional di Peru, a declara prizon preventivo riba solicitud cu fiscalia a presenta pa Moreno, cu ta acusa di labamento di placa y trafico di influencia.

E hues a conclui cu tin varios elemento, cu ta duna seguridad cu Moreno a participa den e delito aki, locual tin un castigo di mas di 4 aña di prizon, y riesgo di huymento. E abogado di Moreno, Jose Castillo a presenta un recurso di apelacion, pa e decision di hues, pero mientras ta procesa esaki, e gobernador di region di Callao a ser deteni pa polis nacional di Peru (PNP) y den proximo oranan instituto nacional penitenciario lo determina na cua prizon Moreno mester sinta su detencion preventivo.

Hamilton Castro, fiscal anti-corupcion, cu ta na cabez di e investigacion den e caso Odebrecht na Peru, a bisa cu Odebrecht, a paga un soborno di cuatro miyon dollar y asina a haya un contrato pa construccion di un caretera na Costa Verde di Callao. E caminda ey ta crusa e costa di El Callao, ciudad cerca di Lima.

60% di e pago ilegal tabata pa Moreno, y 40% pa Gil Shavit, un empresario di Israel. Shavit ta participa den programa di colaboracion cu autoridadnan y el a duna informacion importante pa e investigacion, despues cu el a keda deteni diadomingo pasa na aeropuerto Jorge Chavez, na El Callo – Lima.

Fiscal a presenta prueba cu tabata un documento for di oficina di operacion di Odebrecht. E oficina aki ta destina pa ehecuta soborno cu e empresa mester a haci na Peru, y ey nan a haya registro di dos pago, tocante e contrato di Costa Verde di Callao.

Castro a informa cu Moreno a gasta e placa ey na varios pago pa e publicista di Brasil, Luis Favre. E intencion tabata cu Favre por a duna conseho y asesoria tocante campaña electoral, caminda el a keda eligi como gobernador regional y cu segun su opinion ta un caso di labamento di placa.

Moreno den su argumento di defensa a splica cu e no a haya placa for di Odebrecht y a bisa cu e lo duna un colaboracion den proceso di investigacion, pa asina purba di no bay prizon, despues di decision di e hues. “Por ta cu nos a comete algun eror administrativo, pero nos no a horta placa. Mi no a sconde. Si mi a comete algun delito, mi lo asumi, pero mi no a haya ningun beneficio,” Moreno a bisa.

Na Peru e proceso di investigacion di e caso Odebrecht ta orienta riba descubri e destino di 29 miyon dollar cu e empresa Odebrecht a bisa cu nan a paga na funcionarionan di Peru entre aña 2005 y 2014. E periodo di 2005 y 2014 ta e periodo presidencial di Alejandro Toledo (2001 – 2016) cu un orden di captura pa supuestamente haya 20 miyon dollar na soborno cu a bin for di Odebrecht; Alan Garcia (2006-2011) y Ollanta Humala (2011-2016).