Segun Ministerio Publico ta confirma, awe diamars mainta a detene tres otro sospechoso relaciona cu caso di investigacion di minister Paul Croes. Nan inicial ta S. pa e homber masculino, y dos dama cu inicial AV y LM. Bon Dia a puntra si nan por ta empleado di e bestuur di minister Croes pero Ministerio Publico ta bisa cu no, nan ta hendenan di un uitzendbureau cu inicial B.E. NV.
Vocero di Ministerio Publico ta laga sa cu e homber den e caso aki ta sospecha di complicidad den omkoping. E otro dos damanan y e compania ta sospecha di complicidad di valsheid in geschrifte. Manera cu por brinda mas informacion riba esaki nos lo trece pa dilanti.
Investigacion ta sigui
Minister Paul Croes cu ta bou investigacion den un caso grandi di corupcion cu permisonan di labor, ta suspendi. Esaki Conseho di Minister a formalisa algun dia pasa.
Segun Ministerio Publico, decision pa no detene minister Croes ta tuma door di fiscal y e team cu ta hibando e investigacion. Nan ta laga sa cu loke ta miho pa un investigacion y e rumbo cu kier bay cu ne, esey ta determina e decisionnan. Tambe pa loke ta detencion di sospechosonan. Fiscal ta laga sa cu cada investigacion tin su mesun strategia y su mesun ritmo dentro di cual cosnan ta sucede. “Un investigacion chikito ta logicamente mas rapido. Pero un investigacion grandi y compleho manera esaki tin un caminda den tempo full propio di e investigacion.” P’esey segun fiscal, mester gewoon warda manera cosnan ta desaroya. OM: “Nos nunca lo bisa di antemano ki paso lo tuma den un investigacion.”
Minister ‘sin cartera’
Manera gobierno a anuncia luna pasa caba, e carteranan di e minister encarga cu Labor y Asuntonan Social y Hubentud desde 28 di maart inoficialmente a wordo traspasa pa minister di Financia Angel Bermudez. Awor su suspension ta oficial, como nan a regla e traspaso di e carteranan den un Landbesluit.
Bon Dia Aruba a publica anteriormente cu Ministerio Publico a confirma cu e minister ta sospecha di un extra cargo, esta traficacion di hende. Sinembargo otro medionan di comunicacion a logra di haya un reaccion di abogado Marije Vaders kende ta defende e minister. E ta bisa, segun e medionan cu no tin cargo extra contra e mandatario. Pa motibo cu e ta nada nobo, como e asunto ta referiendo na e señora cu nan a haya den cas di e minister. Segun e abogado e persona aki no tabata ilegal.
Mientrastanto Bon Dia Aruba a publica e informacion di parti di Ministerio Publico cu a saca 3 relatonan pa prensa, unda ta informa cu e señora tabata traha ilegal den e cas di minister y cu Warda Nos Costa a detene. Den e prome dos relato Ministerio Publico no a menciona, tampoco den nan conferencia di prensa riba 28 di maart, cu e minister ta sospecha di traficacion di hende. Esaki Ministerio Publico mes a trece dilanti e siman aki den un relato nobo.
