Como agente policial, Kenny Montero no ta un persona desconoci den nos comunidad. Den mundo di rescate di animal sinembargo, e ta un di esnan cu den ultimo añanan a sa di resalta como un di e lidernan den e movemento aki. Pasobra e kier hiba yuda mas hende y mas animalnan, Kenny ta anuncia su candidatura riba lista di POR, E Forsa Nobo pa e proximo eleccion. For di tempo cu e tabata mucha, Kenny semper tabatin interes pa ley.
Na 2001, el a a slaag pa su HAVO na Colegio Arubano. Na 2002 el a dicidi pa drenta Cuerpo Policial. Na aña 2007 sinembargo, Kenny a dicidi pa bay scol bek anochi, continuando su carera policial. Su perseverancia a haci cu el a logra haya su diploma di VWO. For di eynan el a drenta Universidad di Aruba na unda el a cuminsa studia ley. Akinan atrobe e intencion tabata pa combina su estudio cu e trabou di polis. Kenny su pasion ta animalnan.
“Ya for di tempo cu mi tabata mucha mi tabata salba cacho, parha, morocoy…Tur bestia cu bo por a pensa mi tabata trece cas. Semper mi tabatin e amor pa yuda bestia y e amor pa yuda mi prohimo.” Ultimamente Kenny a haya un plataforma via social media pa yuda animalnan riba un escala mas grandi. Esaki a inspir’e pa hiba su Kenny Montero ta uni su mes na partido POR lucha na un nivel politico. Kenny kier para humanidad y pa animalnan indefenso y trece su mensahe den mas hogar cu ta posibel. “Dignidad y humanidad di nos hende y animalnan. Esaki ta e motibonan dicon mi ta drenta politica.
E fervor di kier yuda mas.” Kenny Montero kier yuda na crea un era nobo den politica na Aruba. Un politica digno pa Aruba su hendenan, basa riba dignidad y respet, balornan cu a bay perdi den politica actual di nos pais. E kier mira mas infrastructura y proyectonan dirigi na nos hobennan, pa asina nan por sinti nan mes stima, cu dignidad y e siguransa cu nan ta miembronan importante den sociedad. Kenny kier mas sosten na mama y tatanan soltero cu tin di traha oranan largo y biaha pa bay pia di trabou leu for di nan yiunan. Tambe e ta propone reactivacion di centronan di bario pa asina vang op muchanan despues di oranan di school. Ademas e kier lucha pa yega na mas dignidad y oportunidadnan pa progreso pa nos grandinan. Como miembro di nos Cuerpo Policial, Kenny Montero sa cu e trabou di polis no ta nada facil. E presion bou cual nan ta traha dia aden dia afo ta hopi grandi. E shiftnan ta largo y e problemanan cu cual nos polisnan ta traha cu ne hopi biaha ta complica. Y pasobra nan ta esunnan yama pa ta eynan ora situacionnan traumatico tuma luga, den hopi caso nan mes tambe ta sufri trauma pa loke nan ta mira y pasa aden.
Esaki ta haci cu pa miembronan di nos Cuerpo Policial e salud fisico, pero tambe mental, ta sufri bou di di e responsabilidad grandi cu nan tin pa tene nos pueblo safe. Kenny Montero kier mira mas proteccion y un miho calidad di bida pa su coleganan cu dia tras dia ta para y riesga nan bida pa Aruba su siguridad. Finalmente, hoben politico riba lista di POR, E Forsa Nobo kier brinda nos ambulantenan adicto e dignidad humano cu nan sigur tambe merece a traves di asistencia diario y programanan di rehabilitacion.
Tur esakinan ta prioridad y balornan cu POR, E Forsa Nobo ta kere firmemente den dje y p’esey nos partido ta mas cu contento di tin Kenny Montero profilando riba su lista. Paso Aruba, sigur POR!
