Maske den ultimo dianan por bisa cu e pandemia ta ‘bao control’, toch keto bay ainda tin casi dos decena di persona interna den hospital pa ricibi tratamento pa Covid-19, e malesa causa pa e virus SARS-CoV-2.
Hospital Dr. Horacio Oduber a informa den su resumen ayera cu tabatin 17 persona total interna pa ricibi tratamento pa Covid-19. Di esakinan, cinco ta den Unidad di Cuido Intensivo ICU, mientras 12 ta isola riba unidad general di covid. Mirando cu e pandemia na e momentonan aki ta considera di ta ‘bao control’, manera prome minister demisionario, Evelyn Wever-Croes a indica e siman aki, Hospital Dr. Horacio Oduber tambe a informa cu lo stop di duna resumen diario di e situacion di pandemia na hospital y lo pasa pa duna resumen dos biaha pa siman.
Di su banda, Departamento di Salubridad Publico, DVG, a informa cu ayera tabatin 12 persona cu a recupera di Covid-19, mientras a registra un total di 10 caso nobo. Di e casonan nobo, 3 no ta residente. E cantidad di caso activo ayera a keda na 68, y e cantidad di fayecido afortunadamente no a conoce aumento y a keda na 106.
E cantidad total di testnan ehecuta ayera na e diferente localidadnan na Aruba, entre otro laboratorio di hospital, laboratorionan priva y aeropuerto ta 705 test. Tasa di positividad, (‘Positivity rate’) entre nos residentenan ta 10%.
