17.675 plachi number no ta cumpli cu impuesto di vehiculo di motor pa 2024

Recientemente, Departamento di Impuesto a anuncia cu plachinan number pa aña 2025 ta na caminda pa aña 2025, sinembargo, ayera mediante un comunicado pa prensa a menciona cu 17.675 number no ta cumpli cu impuesto di vehiculo di motor pa e aña aki.

Actualmente Departamento di Impuesto tin un total di 91.495 number registra pa vehiculonan di motor. Di acuerdo cu e ultimo cifranan, e cumplimento pa cu impuesto di vehiculo di motor di aña 2024 ta mustra cu un total di 72.728 number (79%) ta paga completamente y 17.675 number (19%) no ta paga of no ta paga completamente.

E incumplimento ta mas grandi den e plachinan di categoria A cu ta e categoria mas grandi. Aki ta sigui un bista di algun di e categorianan y e porcentahe di incumplimento den nan categoria.

Pa loke ta trata areglo di pago:

E contribuyentenan cu tin debe atrasa por pidi pa un areglo di pago. Pa debe atrasa di impuesto di vehiculo di motor, Departamento di Impuesto ta duna 3 luna maximo di tempo pa cumpli cu e debe aki.

Departamento di Impuesto ta urgi tur e automobilistanan y motociclistanan cu no a cumpli cu nan pago di impuesto di vehiculo di motor di aña 2024, pa haci esaki mas lihe posibel. Keda sin paga no ta un opcion.

Na e momentonan aki e boet di 50% ta aplicabel y Cuerpo Policial tambe ta haciendo nan control di trafico. Departamento di Impuesto ta keda enfatisa cu un boet ta un gasto cu por wordo evita, si un contribuyente ta cumpli na tempo.

Ta importante pa menciona cu aña 2025 ta den porta y si no atende e debe atrasa, e contribuyentenan aki ta wordo permiti pa paga e impuesto di aña 2025 solamente si nan impuesto di vehiculo di motor ta na ordo. Asina so nan lo por ricibi nan plach’i number nobo.

Compara cu aña 2023, a splica cu nan a cera aña 2023 cu 89.827 vehiculo di motor registra na Aruba, 84% di automobilistanan a cumpli cu e pago di impuesto y 14% no a cumpli, sea cu no a paga completamente of a paga mita di aña so y 2% a entrega nan plachi di number.

E total di incumplimento pa 2023 tabata di 12.912, di e cual 8.445 plachi number cu no a paga nada pa loke ta trata e impuesto aki y 4.467 si a paga un parti.

Esaki ta nifica cu e 12.912 plachi number aki cu no tabatin pago, e automobilista lo mester a bay paga e impuesto di aña 2023 prome cu nan lo por a paga impuesto di aña 2024.