Durante e bishita di prinses Beatrix na Aruba, a sali conoci cu Parke Nacional Arikok lo haya 16 areanan di naturalesa bou su responsabilidad.

Diabierna e prinses a traspasa simbolicamente e area Spaans Lagoen hunto cu prome minister Mike Eman pa Arikok. Oficialmente e ley cu ta regla esaki ya a keda cla, presidente di fundacion Arikok, Greg Peterson ta conta. E area ta 70 hectar grandi y ta uno hopi unico hasta den region. Siguramente tin dobel mas sorto di parha bibando den Spaans Lagoen, cu awor na Parke Arikok.

“Un regalo masha bunita”, sr. Peterson ta conta Bon Dia Aruba, pero e ta splica tambe cu tin 15 area mas na cuminda. Riba mesa tin un acuerdo di principio cu gobierno pa e traspaso di e areanan aki. For di 2010 e lucha pa conserva e terenonan aki a cuminsa unda na 2013 parlamento unanimamente a vota pa un mocion pa proteccion di 16 areanan. Sr. Peterson cu tambe ta presidente di Aruba Bird Life Conservation tambe ta contento cu Bubali Plas tambe ta un di e 16 area aki y pronto lo wordo proteha.

Bubali Plas
Pa e desaroyonan turistico unda e fundacion di parha a bringa den corte, sr. Peterson tambe ta duna di conoce cu gobierno a indica cu nan lo sinta cu e desaroyadonan. Y purba yega na un acuerdo pa haci nan proyectonan un otro caminda. Prinses Beatrix tambe a bishita Bubali Plas unda sr. Peterson a splica e prinses riba e situacion di ‘Jekyll and Hyde’ na Aruba. “Cu esakimi kier mustra riba e dos cara di turismo. Como cu di un banda bo mira tur e luho di e hotelnan y turistanan pasa bon, cocktails, tur esey. Pero di otro banda mester importa 93 trahado di cada 100 empleado necesario pa duna e servicio turistico. 7 so ta bay na hende local. E trahadonan di afo lo trece un averahe di 3 hende. Nan tambe mester bira ciudadano y haya un luga pa biba, tereno. Esaki ta e banda scur di turismo.”

Maneho di gobierno no tabata ‘green’
Esaki ta un presion enorme riba e naturalesa di Aruba, e ta conta. Y banda di esaki e maneho di gobierno no tabata tene cuenta suficiente cu e desaroyo. Mas atencion a bay pa infrastructura, construccion, asina sr. Peterson ta conta. E tambe ta bisa cu e gobierno actual su vision green no a haci Aruba mas berde. “Nan vision ta uno bunita, pero e ta enfoca riba energia sostenibel. Nos como NGO nan ta yama e vision ey shinishi, no berde. Pero awor nos tin un par di ministernan cu a cambia di idea y ta cuminsa duna sosten. Hunto cue desaroyo di energia berde pero tambe conservacion di naturalesa, Aruba si lo bira mas berde.”

Plan pa mantencion y ken ta pag’e
Bon Dia Aruba a puntra director di Parke Arikok, Natasha Silva, con lo mantene Spaans Lagoen y e otro 15 area den futuro. Y con lo yega na e fondonan como cu na Parke Arikok mes tin retonan, entre otro cu no tin suficiente parkranger, etc. E ta splica cu nan ta traha riba e plan di mantencion di 25 aña ainda. Nos a puntra con nan ta yega na e placa y for di sr. Peterson nos ta tende cu gobierno a priminti di bay contribui. Tambe nos a puntra sra. Silva si lo bay hisa entrada pa drenta Spaans Lagoen awor, pero e no por a comenta riba esaki ainda.

Awe un grupo di expertonan, entre otro for di universidad Hulandes di Wageningen lo sinta hunto na Arikok pa discuti con lo maneha e areanan. Sr. Peterson tambe ta conta cu ya nan a cuminsa cu e proceduranan pa tuma hende nobo den diferente funcion, entre otro parkranger.

Finalmente e ta expresa su gratitud enorme pa prinses Beatrix duna su sosten na e naturalesa di Aruba. Segun sr. Peterson su bishita a trece e partidonan, esta NGO nan y gobierno, mas hunto.