Despues di introduccion di parkeer meternan diferente medionan di comunicacion a publica y a splica comunidad di un 15 minuut di lapso cu tin unabes cu minuut caba, cu por yega na bo auto prome cu sancion drenta na vigor. Esaki no ta conta mas y no tin ningun lapso di parkeer gratis, Segun director di Arubus/Aruparking Teo Croes.
Tabatin un comprondemento cu unabes cu bo para bo auto den un parkeer vak y bo core haci algo algun minuut, prome cu 15 minuut bo bay bek y hala bo auto bo no ta wordo sanciona. Esaki ta conta tambe pa despues cu bo minuutnan caba, pa bo yega na bo auto y hala esaki. Sinembargo, a surgi un discrepancia unda cu algun parkeerwachter ta bisa cu esaki por y otronan ta bisa cu esaki no por.
Director di e compania a bisa cu definitivamente no tin “grey period”. E 15 minuut no ta existi. Esunnan cu ta baha carga so por haci uzo di esaki na e momentonan aki cual tambe pronto ta wordo elimina y ta bin cu algo otro cu un permiso special pa nan. Ora cu bo tempo pasa y bo tin mester di mas tempo no tin minuutnan cu ta permiti pa bo recarga di nobo. Pa evita wordo sanciona pa esaki bo mester yega na bo auto prome cu e minuutnan caba.
Mirando cu esaki a trece confusion como na prome instante si a uza e lapso di tempo aki, a puntra Sr. Croes dicon esaki a wordo cambia, sinembargo el a keda enfatisa cu esaki nunca a wordo introduci. El a bisa na comienso tabata tolerante cu esaki y pa motibo cu a cambia e suma pa ora, esaki tambe a bin cun’e.
El a agrega: “Ta invertiendo hopi den siña hende con ta traha cu e mashin, tabata na Expo Cas tambe pa tur hende hunga cu e mashin y siña tur esaki. Lo bay bin cu algun cambio chikito pa despues por enfoca atrobe riba esakinan,” el a finalisa.
