Minister di Turismo, Dangui Oduber a anuncia cu tentativamente entre 15 di juni pa 1 di juli frontera lo wordo habri.

E mandatario tabata cla di bisa cu nan no ta fecha definitivo, sino fechanan ‘tentativo’ cu nan a pone como meta pa asina nos como pais tin tur cos implementa conforme nos protocol di higiena y biosiguridad.

“Di un manera responsabel nos lo anuncia kico ta bira e fecha definitivo,” segun e hoben mandatario. El a agrega cu den todo caso, 15 di juni economia local lo mester wordo reactiva totalmente. E siguiente fase lo bira pa evalua pa lanta e lockdown y habri nos fronteranan

E proyeccion lo ta cu Aruba lo ricibi durante e flexibilisacion aki entre 1 mil y 2 mil bishitante pa siman. Un cantidad basta limita compara cu un promedio di 20 mil bishitante pa siman cu nos tabata ricibi prome cu a wordo decreta e lockdown pa evita importacion di di coronavirus/Covid-19.

El a bisa cu e reapertura aki ta parti di e proceso di recuperacion economico gradualmente, cada nivel di dos siman, cu a cuminsa dialuna 4 di mei. Nan a cuminsa flexibilisa e medidanan cu nan a introduci desde dia 13 di april cu a wordo reporta e dos prome casonan positivo di Covid-19. E mandatario a bisa cu e prome siman di flexibilisacion tras di lomba caba a bay relativamente bon, caminda un caso so a resulta positivo di un persona cu tabata den cuarentena caba.

Certificado.
E mandatario a indica cu ya caba nan a cuminsa pensa riba e siguiente paso cu nan mester tuma, evaluando cu salubridad publico y sector di turismo, kico ta e momento adecua pa di un manera responsabel cuminsa considera pa habri nos frontera bek y kita e lockdown.

Pero prome cu nan ta yega na e decision aki nan mester tin un plan di guia di e sector turistico implementa. Aruba Tourism Authority (ATA) a keda encarga cu e tarea aki hunto cu DVG y tur e autornan di e sector turistico. Ya caba nan ta trahando riba e plan aki cu den e proximo simannan lo wordo debati.

Nan meta ta di por yega na un Aruba Clean Seal Certification Program cu mester ta valido pa nos aeropuerto, terminal di crucero, hotelnan y tur otro tipo di acomodacionnan. Pero tambe pa casinonan, operador di tour, restaurantnan, truck di cuminda, taxi y spa. Kiermen pa tur e sector turistico, nan kier yega cu e tipo di programa aki.

Oduber a bisa cu pa medio di e certificado aki ta wordo declara e sector turistico cu ta cumpli cu tur e medida di limpiesa y higiena. E luganan aki lo wordo desinfecta regularmente.