Cada 15 di februari na nivel mundial ta conmemora e Dia Internacional di Lucha Contra Cancer di Mucha cu un campaña pa conscientisa e poblacion riba esaki y duna apoyo na mucha, hoben, superviviente y famianan di esnan afecta cu e malesa aki.

E dia aki a ser proclama pa Organisacion Internacional di Cancer di Mucha na aña 2001 na Luxemburgo. Organisacion Mundial di Salud (OMS) a organisa e Asamblea Mundial di Salud y Programa General di Trabao 2019-2023, den cual nan ta busca promove e dia aki pa contribui cu e salud di e muchanan y garantisa igualdad den nan tratamento pa e malesa aki.

Cancer di Mucha ta un malesa cu por afecta muchanan for di un edad trempan, desaroyando e crecemento no normal di celulanan maligno den e organismo. Si no ta haya tratamento por crece y genera metastasis afectando e funcionamento di e curpa.

Cancer ta e principal causa di morto den mucha y hobennan rond di mundo. Cada aña mas di 400.000 mucha ta wordo diagnostica cu cancer na henter mundo. Den region di America ta calcula cu tabatin 32.065 caso nobo di cancer pa aña 2020 den muchanan di 0 pa 14 aña, di nan, 20.855 caso a tuma luga na Latino America y Caribe.

Segun cifranan, cancer ta e causa di morto di 8.544 mucha menor di 15 aña na 2020, 7.076 na Latino America y Caribe.

E gran mayoria di muchanan cu cancer ta biba na paisnan cu poco y menos recurso di PIB, na unda nan ta enfrenta desigualdad den aspectonan como deteccion trempan, diagnostico y acceso na tratamento di calidad y cuidadonan.

Na september di 2018, Organisacion Mundial di Salud (OMS) a lansa un iniciativa contra cancer di mucha, cu e obhetivo di aborda e diferente desigualdad aki. E obhetivo ta pa logra por lo menos e 60% di supervivencia di e muchanan cu cancer pa aña 2030 y reduci e sufrimento di tur.

Pa salba bida y reduci sufrimento di e muchanan cu cancer, e iniciativa aki ta busca aumenta capacidad di e paisnan pa brinda servicionan di calidad pa muchanan cu cancer y priorisa e cancer di mucha na nivel nacional, regional, y mundial pa haci impulso di accionnan.

E pakete tecnico nobo di Organisacion Mundial di Salud denomina ‘CureAll’, lo sirbi como guia pa paisnan implementa e iniciativa global, CureAll a ser presenta pa OMS den e Dia Internacional di Cancer di Mucha, dia 15 di februari di 2021.

Di acuerdo cu Organisacion Panamericano di Salud (OPS) tanto mucha homber como mucha muhe por padece di cancer, unda cu leukemia of lymphoma ta esun di mas frecuente den muchanan, den e dia aki OMS a destaca seis tipo di cancer pa preveni den muchanan: Leukemia, Lymphoma di Hodgkin, Retinoblastoma, Tumor de Wilms, Lymphoma di Burkitt y Glioma di grado abao.

E sintomanan cu OPS ta destaca cu ta wordo considera pa diagnostico y prevencion ta: hopi cansancio, kentura, e mucha ta soda den oranan di anochi, perdida di peso sin motibo, inflamacion y dolor, dificultad di hala rosea, sacamento, dolor di cabes cu ta permanece mas cu normal, entre otro.

E desafionan pa aña 2030 ta cu na 2022 OMS conhuntamente cu Iniciativa Global pa Cancer di Mucha (GICC) ta propone e topico di “Logra cura cancer di mucha ta posibel”, den agenda di ONU 2030 ta inclui e tema aki cu e obhetivo di logra alcansa e supervivencia di mas di e mita di tur e muchanan rond di mundo.

E comportamento cu por disminui e riesgo di cancer ta cu hende muhe por bebe suficiente folate of acido folico durante embaraso, duna lechi di pecho, haci suficiente actividad fisico den edad di mucha, garantisa relacionnan y ambiente sigur, stabiel y enrikecedor pa tur mucha y nan famia.

Asina mes tambe ta hopi importante pa tene na cuenta evita consumo di alcohol y sigaria durante embaraso, mantene e muchanan leu for di personanan cu ta huma, reduci nan exposicion na contaminacion ambiental genera pa trafico di autonan y busca antecedentenan familiar.

Den e Dia Internacional di Lucha contra Cancer di Mucha ta bon pa diferente instancianan gubernamental y di salud pa crea iniciativanan cu lo garantisa atencion medico pa tur mucha y un diagnostico y tratamento adecua.