Durante un entrevista pa Bon Dia Aruba a keda conoci cu Arubus N.V tambe a introduci un orario nobo di busnan dia 5 di september ultimo.

Esaki ta un schedule definitivo pa motibo cu despues di pandemia nan a cambia nan orarionan na unda nan tabata core segun orario di diadomingo cu tabatin menos circulacion cu den dianan di siman, manera Sanin Daou PR di Arubus N.V a anuncia.

Doau a bisa cu esey a duna pa nan un chens pa mira kico por haci y kico no y e ora nan adaptacionnan cu frecuencianan di busnan nan a introduci full un orario of schedule nobo cu a cuminsa dia 5 di september ultimo.

“Di e manera aki nos por traha di un manera mas efectivo pasobra nos sa exactamente kico mester, por ehemplo, antes e prome bus tabata sali 4or y 55 minuut di mainta direccion Playa pa Hotel pero awor nos a cambia esey y nan ta sali 4or y 50 minuut”, Daou a expresa.

Den orario di dialuna pa diabierna tin mas cambionan diferente di loke nan tabatin anteriormente cu personanan interesa por hay’e riba nan website www.arubus.com/routes-schedules cu ta hopi interactivo manera Daou a sigura pa motibo cu eynan e personanan ta haya e direccion na unda e ta bay y ta bay haya e liñanan cu descripcion, orario y e mapa di e ruta, pa asina por haya informacion na unda precies por subi un bus y na unda e busnan ta pasa.

“Di e manera aki ta hopi mas duidelijk pa e personanan por haya e informacion”, Daou a informa.

Di e rutanan el a bisa cu nan tin diferente cu ta di San Nicolas pa Oranjestad, Noord, Santa Cruz, Sabana Basora, e cinco diferente area cu tin nan propio orario y ademas nan a actualisa tambe nan rutanan di scol cu tambe ta disponibel riba e website www.arubus.com/schools y eynan ta haya orario di mainta y merdia cu liñanan, descripcion, orario y mapa tambe.

Pa pasaheronan normal e rutanan a keda igual, pero pa rutanan di scol nan a agrega dos ruta mas cu ta yama S13 y S14 di e cual 14 bus di scol ta funciona den oranan di mainta y merdia.

Na e momentonan aki, Arubus N.V tin riba caminda 20 bus cu ta cubri diferente rutanan menciona caba, ademas Daou a informa pa Bon Dia Aruba cu proximamente 15 bus nobo lo ta yegando na Aruba, di e mesun compania cu nan ta wordo asambla na Brasil, di esaki, el a manifesta cu door di pandemia nan mester a yega Aruba caba pero Brasil tabata den un lockdown completo y esey no tabata posibel.

Daou no a duna detayenan precies riba ki dia e busnan lo ta na Aruba pero el a indica cu den proximo dianan comunidad lo haya mas informacion.

Tocante incidentenan cu a tuma luga cu e busnan aki el a sigura cu esey tabata pa motibo di airco cu mester a wordo ahusta y no tabata fria e bus suficiente, e compania cu ta fabrica e busnan ta esunnan cu ta encarga di haci e reparacion.

For di aña 2019, minister demisionario di Transporte, Comunicacion y Sector Primario Chris Romero a anuncia e compra di 30 bus nobo pa Aruba, 15 di nan lo ta yegando proximamente pa completa e fleta cu 35 bus.