Pa medio di un comunicado di prensa, Ministerio Publico ta informa lo siguiente:
Afpakteam di Aruba, cu a cuminsa traha riba prome di maart ultimo, a confisca un suma grandi na dollars riba diahuebs 16 di maart ultimo.
Tur cos a sucede ora cu Kustwacht a controla un barquito for di Colombia. E capitan a resulta di tabata tin un suma grandi na dollars cerca dje. Bao guia di Ministerio Publico y den cooperacion estrecho cu KPA y Aduana, e capitan a wordo deteni riba sospecho di labamento di placa. E dollars a wordo tuma den beslag. E investigacion ta continua.
E afpakteam ta un cooperacion entre Ministerio Publico, Cuerpo Policial di Aruba, Aduana di Aruba, Fiot (Team Fiscal di Investigacion y Persecucion) di Departamento di Impuesto, FIOD (Departamento Fiscal di Investigacion y Persecucion), Marechaussee(KMAR), Kustwacht Aruba, MOT y RST. Meta ta combati criminalidad financiero-economico.
