Na aña 2016 un total di 140 keho a drenta na sindicato FTA. Vice- presidente di FTA y encarga cu e seccion di keho, Tairone Bremo a duna un bista di e cantidad di keho cu e sindicato aki ta atendiendo. Ainda di e 140 kehonan cu a drenta e aña aki, nan ta atendiendo 49 di nan; y tin alrededor di 47 keho cu a wordo pasa pa man di nan abogadonan.
E ta splica cu nan ta defini como keho cualkier problema cu e trahado ta confronta na trabou. For di un yamada di atencion of aviso inhusto, suspension te na retiro. E aña aki nan a atende cu e tres tipo di kehonan aki, specialmente relaciona cu hopi retiro cu a caba den man di nan abogadonan pa busca algun alternativa, entre nan bay corte.
FTA ta purbando pa mehora nan servicio pa atende cu tur e kehonan cu ta drenta pa medio di automatisa e proceso. Tambe dunando formacion na nan delegadonan pa nan por atende cu e problema aki mas miho. E sindicalista Bremo ta bisa cu e realidad ta cu hopi di e problema cu ta tuma luga na pia di trabou no ta yega tog na e sindicato. Eventualmente e tin di haber cu falta di comunicacion of e cultura di miedo cu lastimamente ta reina hopi den ambiente laboral.
Un problema cu nan ta confronta tin di haber cu Riu hotel cu nan abogado ta bin atendiendo y cu eventualmente lo por conclui den un accion di protesta, segun e sindicato aki. Sr. Bremo a indica cu ta existi un mal ambiente di trabou ya cu e trahadonan no ta contento cu loke nan ta gana y nan ta cuestiona si e compania ta pagando nan debidamente. “Nos no sa cual ta e motibo mes cu e compania mes no kier yuda pa sali for di incertidumbre aki a menos cu tin cos pa sconde.”
“E hende ta prefera guli, wanta y esey no ta na su luga.” Pa FTA atende e problemanan aki y pa nan bira menos, e trahadonan mester cumpli cu loke ta su trabou. “Pero e mester ta e prome pa stop e abuso”, asina sr. Bremo ta conclui.
