Diaranson mainta a tuma luga un conferencia di prensa na DIP/DOW, caminda director di DOW, Marlon Croes a splica tocante e situacion di Eagle Beach, unda tin un kiosco riba tereno di gobierno y construccion a tuma luga ilegalmente.

Croes a informa tocante e aspecto di construccion ilegal cu a papia di dje siman pasa, y cual Bon Dia Aruba a publica. Nan a indica cu DOW y DIP lo forma aliansa pa combati cualkier construccion ilegal rond di Aruba.

Nan a splica di tres diferente situacion, con lo visualisa y controla, pa asina tuma medida necesario. Sea ta trata mal uzo di tereno, mal uzo di propiedad di gobierno of cu un persona ta traha algo ilegal mes.

Den e caso cu a tuma luga diaranson mainta na un kiosco na Eagle Beach, ta trata di un persona cu tabata huur di propiedad di gobierno anto e persona a haci construccion riba dje sin permiso di facilidad di DIP.

Tambe e persona a haya un carta dos siman prome, pa asina e por acerca DIP pa purba legalisa y combersa cu gobierno; sinembargo Croes ta bisa cu e persona no a haci uzo di e oportunidad aki. Pa e motibo ey DIP y DOW a bay na e luga pa asina eherce nan trabou.

“Esey ta e trabou cu ta tumando luga. Ambos departamento tin bon cooperacion y lo sigui fortalece. Accion contra construccion ilegal, mal uzo di tereno di propiedad di gobierno lo keda enforsa pa keda riba e linea corecto”, Croes a menciona.

A punta si dos siman ta mucho poco pa e persona drecha e proceso cu gobierno. Croes a bisa cu dos siman ta algo cu pa varios aña ta aplica. Den pasado, 20 aña pasa tabatin un caso unda a pidi pa un persona coregi algo, nan a dun’e dos dia. E persona a hiba nan corte y a dicta sentencia, unda cu ta duna un persona un termino pa regla e situacion pa asina por actua.

Den e caso en cuestion, hues a dicta cu 14 dia (dos siman) ta suficiente pa regla e situacion. E ta conta como un periodo den cual e persona por acerca e departamento pa cuminsa combersacion y yega na un solucion.

Croes ta splica cu locual tabatin riba e tereno, prome a pidi pa , pero e persona no a haci caso. E ta un caso similar cu e situacion di mangel halto, ‘caminda a pidi’e pero no a haci caso’

El a bisa cu ta importante pa e persona regla tur cos na tempo y busca solucion. Na momento cu e departamento haci nan trabou pa bay kita e construccion, ta laat caba.

Den caso cu e persona hiba nan Corte, Croes ta bisa cu nan ta convenci cu nan ta bon para huridicamente. Tambe el a bisa cu tin varios construccion ilegal tumando luga, pero ambos departamento lo sigui traha hunto pa haci inspeccion y controla.

“Ora cu bo haci e tipo di controlnan aki, bo ta haya comunidad mes ta yuda pa duna señal unda tin algo construyendo ilegal y tuma accion. Ta inventarisa, wak kico e problema ta. A base di esey ta tuma medida. Tur cos ta un proceso di ambos departamento pa analisa”, Croes a splica.

Pa persona cu ta haciendo un construccion ilegal, Croes ta bisa cu tin dos caminda pa cana, cual un ta pa nan mes ruim op di nan mes ‘boluntariamente’. E otro ta pa persona bin cerca DIP cu DOW pa sinta hunto cune, pa wak kico ta legal of no a base di ley.

Si e ta legal, nan por haci e trabou di coopera, pero si no ‘e tin cu bay’. “Ora bo construi algo sin permiso necesario, bo sa cu e tereno no ta di bo pero di gobierno. Anto mester pidi e permiso ey. Esey ta manera simpel”, Croes a bisa.