Dialuna ultimo, Fabian Werleman, coordinador di Banco di Sanger Aruba, a tene un conferencia di prensa pa asina informa comunidad cu awe ta un dia special pa nan: e Dia Internacional di Dunado of donante di Sanger.

Werleman a señala cu esaki ta e dia cu nan ta reconoce tur e dunado di sanger na nivel mundial y specialmente esnan di Aruba. E ta un fiesta cu ta reconoci internacionalmente unda cu nan ta para un rato pa gradici na esnan cu tambe ta traha den e banco di sanger, uzadonan di banco di sanger cu tin na hospital y e dunadonan cu nan tin.

For di basta tempo caba, Banco di Sanger ta solicitando mas boluntario pa por duna nan sanger. Pa esaki, for aña pasa te cu awor, Werleman a bisa cu e cantidad di donantenan a baha un poco, “pero esey tin di haber cu otro factornan, no cu nan kier stop di duna sanger, pero si door di nan salud. P’esey nos ta bin cada aña back pa pidi pa hendenan cu ta desea pa bira donante, pa nan meld cerca nos, yama nos, of tambe por bay riba nos website cu ta www.bloedbankaruba.aw unda por haya un afspraak pa cuminsa e proceso pa bira un donante,” Werleman a bisa.

Entre esnan cu tin problemanan di salud cu no por duna sanger, el a indica cu esey ta hendenan cu ta hayando diferente malesa como diabetes, unda e pashent ta depende di insulina y pashentnan cu cancer cu cada dia ta birando mas hopi.

Den e plannan cu nan tin pa stimula hende pa bira un dunado di sanger, el a splica cu nan ta bay cuminsa bishita companianan pa pidi nan ayudo y laga e trahadonan cu ta desea pa bira dunado boluntario.

E cantidad di donantenan pa cada pais ta representa entre 3% pa 5% di nan poblacion. Pa loke ta trata Aruba, tin mester di entre 3.000 pa 5.000 dunado di sanger.

E unico manera cu nan por yena nan necesidad di falta di sanger ta por medio di pidi nan donantenan pa duna sanger mas frecuente y esey ta algo cu nan ta bin haciendo.

Donacion di sanger ta consisti di tres producto: plaketa, plasma y globulo cora cu ta sali di e mesun donante; esaki por yuda tres pashent.

E procedura medico ta consisti cu e sanger ta pasa pa un prome fase di centrifuga. Eynan e sanger ta bira den un velocidad halto y despues ta bay pa e dos fase na un ekipo cu ta separa e globulonan cu e awa y di otro banda e plasma cu e plaketanan. Pa e di tres fase e sanger ta haya un likido special pa finalmente duna como resultado un sanger filtra cu nan lo por usa pa un pashent.

Ta importante cu un persona lo por duna su sanger pa motibo cu semper ta existi un persona cerca di nos, sea ta famia of hende conoci, cu por tin mester di sanger den algun momento di su bida. E sanger ta ireemplasabel y no tin prijs. Simplemente e ta haci un cos importante: E ta yuda salba bida.