Den cuadro di por promove mas siguridad den trafico dor di haci varios control preventivo, e ekipo di Polisnan riba brommer a uza henter fin di siman pa controla na luganan strategico den e districto di Oranjestad y Noord. Algun siman pasa a Sali caba cu un grupo di Polisnan hoben studiando na Academia Policial, pa asina nan gana experencia den e proceduranan cu mester tuma luga ora di para un auto pa control, dunamento di multa, kita rijbewijs, otorga un prohibicion pa stuur of hasta ora di tuma un auto den beslag.
Alex Pieters di e unidad di Polis riba motorcycle a conta cu tur aña atrobe, ora cu yega e temporada di mita di aña, cu vakantie cuminsa drenta, cu mesora ta nota cu e cantidad di accidentenan pisa ta aumenta. Ya caba Aruba ta conta cu 4 morto den trafico e aña aki, pa cual Polis kier logra pa mantene menos posibel dor di aumenta e cantidad di control preventivo.
Polis ta enfoca mas awor aki riba coremento di auto cu velocidad halto y stuurmento bou influencia di alcohol. Ta notando un aumento den e dos delitonan aki, specialmente den oranan di anochi, pa cual lo por topa cu unidadnan di Polis ta controla, sea riba velocidad of laga chauffeurnan supla pa midi e nivel di alcohol den nan rosea.
Durante control den fin di siman pasa, a para mas o menos 250 auto den e districto di Noord y Oranjestad. Na tur a detene 14 persona y a kita 6 rijbewijs di chauffeur.
Polis ta conseha automobilistanan pa sea mas consciente y no bebe di mas di bo tin pensa di stuur. Ta considera cu despues di 3 bebida, cu ya caba bo ta bou influencia, pa cual lo tuma medida contra Bo. Ta miho pa den casonan asina, pa yama un taxi of un amigo pa stuur pa bo y hiba bo cas, pa asina evita di tuma e risico pa stuur toch y pa Polis para bo.
Durante e control aki, Polisnan ta para 10 auto pareu y ta laga tur hende supla, sea cu nan a bebe of no, pa asina midi e nivel di alcohol den rosea. Den caso cu e ta mas cu locual ta permiti, lo bay over na detencion. Stuurmento di auto bou influencia di alcohol ta un delito serio, specialmente pasobra su consecuencia por ta hasta fatal.
