Recientemente Fundacion Telefon pa Hubentud a informa a traves di un comunicado di pensa cu e fundacion a wordo certifica pa e Child Helpline International, cual ta un organisacion di impacto colectivo cu 155 organisacion como miembro, cu ta duna ayudo telefonico y di internet na mucha y hoben den 133 pais y teritorio rond mundo.
Desde aña 2004, Telefon pa Hubentud ta miembro di Child Helpline International y na mas di un ocasion 131 tabata representante di Child Helpline International pa e region di Caribe y Latino America.
E fundacion ta remarca cu como miembro prominente, 131 a yuda otro paisnan den Caribe y Latino America pa establece nan liña di ayudo telefonico y di internet pa mucha y hoben. Tambe na diferente ocasion e personal di 131 a duna diferente training na personal di otro liñanan di ayudo telefonico y di internet den Caribe, Latino America, Qatar y Sur Africa.
Un di e tareanan di Child Helpline International ta monitor e calidad di servicio y e ‘Child Safeguarding Policy’ cu su miembronan ta implementa na nan pais. E mucha y hoben buscando ayudo cerca un liña di ayudo telefonico y di internet, no mag di hay’e cu mas problema door di e ayudo ricibi y mester ser trata den tur seguridad. E mucha/ hoben su seguridad tan a prome lugar y e ayudo ricibi no mag di ocasiona mas problema pa e mucha.
Despues di un evaluacion basa ariba ‘Child Helpline International’s Core Quality Standards’ cu a inicia na comienso di aña 2023, Fundacion Telefon pa Hubentud a ricibi e noticia cu nan a pasa e evaluacion exitosamente y pues ta ricibi e certificacion oficial di e organisacion internacional aki.
“131 ta sumamente contento di a pasa e evaluacion aki exitosamente. Pa 131 e calidad di servicio cu ta ser duna na e mucha y hobennan, y e seguridad cu ta ser brinda na e mucha y hoben na momento cu e ta den contacto cu un di e servicionan di 131 ta sumamente importante,” e fundacion a enfatisa.
E fundacion a resalta cu pa por a yega na e resultado positivo aki, 131 ta duna e mentornan diferente training durante henter aña, ta evalua e impacto di su servicionan y ta incorpora diferente instrumento den su maneho pa salvaguardia e seguridad di e mucha/ hoben cu ta den contacto cu un di e servicionan di 131.
