(NLTimes) – Compania Frances, TiteLive, cu ta provee software pa cantidad di tienda di buki Hulandes, a haya su sistemanan shut down, segun reportenan, pa un atake di secuestro cibernetico (ransomware). Alrededor di 130 tienda di buki na Hulanda a keda afecta, segun e compania a bisa.
E tiendanan no por haya acceso na nan base di datos di buki y factura, maske e basenan di dato ta parce di no a sufri ningun daño. Nan por opera, pero solo manualmente.
Cadena di tienda di buki Libris a bisa NOS cu su alrededor di 90 sucursal ta afecta, pero ta continua bendiendo buki. “Bo ta ricibiendo buki ainda for di e editor, pero bo no sa pa ken”, un vocero a bisa. “Na momento cu hende ta bestel un buki, e tiendanan mester traha manualmente. Por bende buki den e tienda, pero ta hopi fastioso.”
Athenaeum Boekhandels a confirma cu nan no por haya acceso na nan sistema, pero ainda ta bendiendo buki den nan tienda. “A hack e portal, pero afortunadamente nada a pasa na e base di dato. Nos por sigui bende buki, e cash register ta traha.”
