Inicio di e siman aki, Departamento di Salubridad Publico DVG a informa cu lo inclui informacion di pashentnan di Covid di Aruba cu a fayece na Colombia den su update di dialuna.
Segun DVG, e cantidad di fayecidonan relaciona cu COVID-19 na Aruba ta 198 y datos ricibi di pashentnan cu desde juli 2021 a wordo trasporta pa tratamento medico na Colombia relaciona cu COVID ta indica cu 13 residente lamentablemente a fayece. E proceduranan administrativo te cu awor a keda completa y por wordo incorpora den e data total di fayecidonan di Pandemia di Covid-19 di Aruba. Forsa na famia di tur e fayecidonan cu a pesar di tur esfuerso haci, toch a perde e bataya contra COVID durante e ultimo lunanan. E dato recien aki ta eleva e cifras di morto registra na Aruba na 211.
Ademas, den su resumen di ayera, DVG a informa cu 5 persona a recupera mientras a registra un total di 13 caso nobo di Covid-19, di cual cinco no ta residente. E cifranan aki ta representa un tasa di positividad entre nos residentenan di 14 porciento.
E cantidad di casonan activo di COVID-19 ayera tabata 60 y cantidad di fayecidonan relaciona cu COVID-19 ta 211. Datonan di DVG ta ilustra casonan nobo di COVID cu un averahe semanal di 14 caso pa dia y un averahe di tasa di positividad semanal di 24% pa dia.
Actualmente na Aruba tin 7 persona interna cu of debi na COVID di cual den ICU tin 1 persona y riba piso general tin 6. Na Colombia tin actualmente 6 persona den ICU y ningun (0) riba piso general.
